ba-paas-e-dil jise apne labon se bhi chhupaayaa thaa — Qateel Shifai

abhi to baat karo ham se doston ki tarah
phir ikhtilaaf ke pahlu nikaalte rahnaa

aakhri hichki tire zaanun pe aae
maut bhi main shaairaana chaahtaa huun

apne haathon ki lakiron mein sajaa le mujh ko
main huun teraa tu nasib apnaa banaa le mujh ko

nikal kar dair-o-kaaba se agar miltaa na but-khaana
to Thukraae hue insaan khudaa jaane kahaan jaate

kyuun sharik-e-gham banaate ho kisi ko ai 'qatil'
apni suuli apne kaandhe par uThaao chup raho

ab jis ke ji mein aae vahi paae raushni
ham ne to dil jalaa ke sar-e-aam rakh diyaa

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

apne ehsaas se chhu kar mujhe sandal kar do
main ki sadiyon se adhuraa huun mukammal kar do

hazaaron mausamon ki hukmaraani hai mire dil par
'vasi' main jab bhi hanstaa huun to aankhein bhiig jaati hain

tumhaare baa'd ab jis kaa bhi ji chaahe mujhe rakh le
janaaza apni marzi se kahaan kandhaa badaltaa hai

DhunDte ho kyuun jali tahrir ke asbaaq mein
main to kohre ki tarah dhundle nisaabon mein rahaa