utro khud apni zaat ki gahraai mein 'khalish' — Rauf Khalish

jazb kar ke rakh lenaa dastakein hatheli mein
jab se main safar mein huun ham-safar hain darvaaze

guzarte vaqt ke aasaar kaun chhoD gayaa
zamaane Tal gae lekin aTal rahe hain sutun

bikharte khvaabon se taabir ke dhundlakon tak
muhaajrat ne kachoke bahut lagaae hain

jis tanaazur mein bhi dekho khush-jamaalon ko 'khalish'
zaaviya bigDaa nazar kaa saare bigDe zaaviye

zakhmon ko phuul kar de tanhaaiyon ko marham
sau qurbaton pe bhaari hijrat kaa ek mausam

kahin hujum mein tanhaai mil gai thi mujhe
main ro diyaa tiri yaadon se guftugu kar ke

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

hamaari hi tamannaa kyuun karo tum
tumhaari hi tamannaa kyuun karein ham

ye vasl ki khvaahish bhi miyaan bul-havasi hai
jis dil mein mohabbat ho tamanna nahin hoti

sainkaDon dilkash bahaarein thiin hamaari muntazir
ham tiri khvaahish mein lekin Thokarein khaate rahe

dil ko niyaaz-e-hasrat-e-didaar kar chuke
dekhaa to ham mein taaqat-e-didaar bhi nahin

chaae piinaa to ik bahaana thaa
aarzu dil ki tarjumaani thi