tere bin ghaDiyaan gini hain raat din — Rehman Faris

miri to saari duniyaa bas tumhi ho
ghalat kyaa hai jo duniyaa-daar huun main

shajar ne puchhaa ki tujh mein ye kis ki khushbu hai
havaa-e-shaam-e-alam ne kahaa udaasi ki

vo pahle sirf miri aankh mein samaayaa thaa
phir ek roz ragon tak utar gayaa mujh mein

tum to darvaaza khulaa dekh ke dar aae ho
tum ne dekhaa nahin divaar ko dar hone tak

kahaani khatm hui aur aisi khatm hui
ki log rone lage taaliyaan bajaate hue

mujh ko khud mein jagah nahin milti
tu hai maujud is qadar mujh mein

jab ki pahlu se yaar uThtaa hai
dard be-ikhtiyaar uThtaa hai

yaad aai hai to phir TuuT ke yaad aai hai
koi guzri hui manzil koi bhuli hui dost

khudaa ke haath mein mat saunp saare kaamon ko
badalte vaqt pe kuchh apnaa ikhtiyaar bhi rakh

jis ghaDi ghurte ho ghussa se
nikle paDtaa hai pyaar aankhon mein

is naghmagi kaa thoDaa gunah-gaar main bhi huun
mujh se bhi is jahaan mein halchal rahi hai dost

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe