apni zanjir-e-paa ko dekhtaa huun — Riasath Ali Asrar

chaandni surkh si dikhaai de
ye moharram kaa chaand hai 'asraar'

ham na aae junun ke bas mein kabhi
ye garebaan khirad ne chaak kiyaa

be-karaan dasht-e-tasavvur mein bhaTakne ke nuqush
mauj-dar-mauj saraabon se ubharte honge

aap ham se judaa nahin hote
aap par ikhtiyaar hai koi

kyaa us se bichhaDte ki mile hi na the jis se
ik-tarfa mohabbat ke bhi hain zaaviye kyaa kyaa

mahv hain hazrat-e-khayaal apne
haal-e-dil mein muraaqiba baandhe

mere khvaabon ke jharokon ko sajaate rahiye
na sahi vasl magar yaad to aate rahiye

log patthar ke the fariyaad kahaan tak karte
dil ke viraane ham aabaad kahaan tak karte

kahin hujum mein tanhaai mil gai thi mujhe
main ro diyaa tiri yaadon se guftugu kar ke

kam-sini jin ki hamein yaad hai aur kal ki hi baat
aaj unhein dekhiye kyaa ho gae kyaa se baDh kar

gham-e-hayaat se itni bhi hai kahaan fursat
ki teri yaad mein ji bhar ke ro liyaa jaae

karnaa hi paDegaa zabt-e-alam piine hi paDeinge ye aansu
fariyaad-o-fughaan se ai naadaan tauhin-e-mohabbat hoti hai