gham-e-hayaat se itni bhi hai kahaan fursat — Rifat Sultan

umr bhar tujh ko dekhne par bhi
zauq-e-nazzaara kam nahin hotaa

dil mein koi khushi nahin lekin
aadatan muskuraa rahaa huun main

tu miri baat kaa javaab na de
main samajhtaa huun khaamushi ki zabaan

mujhe bhi yuun to baDi aarzu hai jiine ki
magar savaal ye hai kis tarah jiyaa jaae

ab is maqaam pe laai hai zindagi mujh ko
ki chaahtaa huun tujhe bhi bhulaa diyaa jaae

jaltaa rahaa huun ziist ke dozakh mein umr bhar
ye aur baat hai miri koi khataa nahin

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

yaad-e-maazi gham-e-imroz umid-e-fardaa
kitne saae mire hamraah chalaa karte hain

jaane ye tu hai tiraa gham hai ki dil ki vahshat
jaanib-e-koh-e-nidaa koi bulaataa hai mujhe