sone vaalon ko kyaa khabar ai hijr — Saqib Lakhnavi

hijr ki shab naala-e-dil vo sadaa dene lage
sunne vaale raat kaTne ki duaa dene lage

aadhi se ziyaada shab-e-gham kaaT chukaa huun
ab bhi agar aa jaao to ye raat baDi hai

ai chaman vaalo chaman mein yuun guzaaraa chaahiye
baaghbaan bhi khush rahe raazi rahe sayyaad bhi

mushkil-e-ishq mein laazim hai tahammul 'saaqib'
baat bigDi hui banti nahin ghabraane se

bu-e-gul phulon mein rahti thi magar rah na saki
main to kaanTon mein rahaa aur pareshaan na huaa

balaa se ho paamaal saaraa zamaana
na aae tumhein paanv rakhnaa sambhal kar

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

ujaalaa apne gharaunde mein rah gayaa to raat
kahaan qayaam karegi kahaan se guzregi

havaa se kah do ki khushbu kaa haath chhoD bhi de
abhi charaagh ki lau ko tiri zarurat hai

sameTtaa rahaa khud ko main umr-bhar lekin
bikhertaa rahaa shabnam kaa silsila mujh ko