log sar phoD kar bhi dekh chuke — Shahryar

dil mein rakhtaa hai na palkon pe biThaataa hai mujhe
phir bhi ik shakhs mein kyaa kyaa nazar aataa hai mujhe

chal chal ke thak gayaa hai ki manzil nahin koi
kyuun vaqt ek moD pe Thahraa huaa saa hai

zabaan mili bhi to kis vaqt be-zabaanon ko
sunaane ke liye jab koi daastaan na rahi

safar kaa nashsha chaDhaa hai to kyuun utar jaae
maza to jab hai koi lauT ke na ghar jaae

har taraf apne ko bikhraa paaoge
aainon ko toD ke pachhtaaoge

bataaun kis tarah ahbaab ko aankhein jo aisi hain
ki kal palkon se TuuTi niind ki kirchein sameTin hain

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

gae zamaanon ki dard kajlaai bhuli bisri kitaab paDh kar
jo ho sake tum se aane vaale dinon ke rangin khvaab likhnaa

us ko dekho kabhi udaasi mein
kis balaa ki hasin lagti hai

kis tarah bhulaaein ham is shahr ke hangaame
har dard abhi baaqi hai har zakhm abhi taaza hai