ye maajraa-e-mohabbat samajh mein aa na sakaa — Shakir Kalkattvi

zaraa chashm-e-karam se dekh lo tum
sahaaraa DhunDhtaa huun zindagi kaa

rone ke badle apni tabaahi pe hans diyaa
'shaakir' ne is tarah gila-e-aasmaan kiyaa

qasam hi nahin hai faqat is kaa sheva
taghaaful bhi hai ek andaaz us kaa

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

thak gayaa hai dil-e-vahshi miraa fariyaad se bhi
ji bahaltaa nahin ai dost tiri yaad se bhi

jaane kitne Dubne vaale saahil par bhi Duub gae
pyaare! tufaanon mein rah kar itnaa bhi ghabraanaa kyaa