un se 'sharar' kuchh aise bichhDe — Sharar Fatehpuri

kuchh na hone kaa gumaan thaa phir bhi
kuchh to hone ko huaa thaa kyaa thaa

us sitam pesha kaa eajaaz-e-sitam hi hogaa
dast-e-qaatil ko agar dast-e-masihaa likkhun

maslahat thi koi vo chup the agar
bolne vaale to khul kar bolte

mere hi khuun mein nahlaa ke 'sharar'
vo salibon pe sajaa degaa mujhe

kyaa thi vo dair-o-haram ki duniyaa
jo bhi duniyaa kaa khudaa thaa kyaa thaa

be-hisi vo hai ki is daur mein jiine kaa mazaa
na gunaahon mein rahaa aur na savaabon mein rahaa

zindagi tu bhi hamein vaise hi ik roz guzaar
jis tarah ham tujhe barson se guzaare hue hain

kuchh chhoTe chhoTe dukh apne kuchh dukh apne azizon ke
in se hi jivan bantaa hai so jivan ban jaaegaa

bahut aziiz thi ye zindagi magar ham log
kabhi kabhi to kisi aarzu mein mar bhi gae

chand lamhe ko tu khvaabon mein bhi aa kar jhaank le
zindagi tujh se mile kitne zamaane ho gae

jitnaa ham se ho sakaa ham ne kiyaa
zindagi tu hi bataa mar jaaein kyaa

chalaa gayaa jo mujhe chhoD kar na jaane kahaan
main us ke naam pe ye zindagi guzaarun kyon