abhi se falsafa-e-reg-zaar ki baatein — Shehzad Anjum Burhani

dil ki hi kisi baat ko tahrir na kar paae
likhne pe jab aae the to kyaa kyaa nahin likkhaa

ye kyaa ki khayaalon se uDi jaati hai khushbu
main ne to abhi tak use sochaa bhi nahin hai

'arzi insaaf ki ham ne bhi lagaa rakkhi hai
dekhiye zill-e-ilaahi hamein kab puchhte hain

zamaana jin ki qayaadat mein gaamzan thaa vo log
bhaTak gae tiri aankhon ki rahnumaai mein

vo phuul hai to use jaan tak karo mahsus
vo chaand hai to andheraa baDhaa ke dekhaa jaae

aaj ki raat hai bahut bhaari
aaj ki raat bas guzar jaae

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ishq mein ain hunar-mandi hai
sab jise be-hunari kahte hain

miri nadim mohabbat ki rifaton se na gir
buland baam-e-haram hi nahin kuchh aur bhi hai

chale ho dasht ko 'naazim' agar mile majnun
zaraa hamaari taraf se bhi pyaar kar lenaa

nuqsaan ho rahaa hai bahut kaarobaar mein
abbaa paDe hain jab se paDosan ke pyaar mein