dil ki har baat kah gae aansu — Syed Basit Hussain Mahir Lakhnavi

hamein to yaad nahin koi lamha-e-ishrat
kabhi tumhin ne kisi din hansaa diyaa hogaa

dekh kar kaali ghaTaa ahl-e-qafas
aur kyaa karte taDap kar rah gae

phirti hai to phir jaae badalti hai to badle
duniyaa ki nazar hai miri qismat to nahin hai

tark-e-ulfat se mohabbat kaa likhaa miT na sakaa
vahi afsurdagi-e-shaam-o-sahar aaj bhi hai

kamar baandho muqaddar ke sahaare baiThne vaalo
shikast-e-razm se raahon kaa pech-o-kham na badlegaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

yaarab tu us ke dil se sadaa rakhiyo gham ko duur
jis ne kisi ke dil ko kabhi shaadmaan kiyaa

auron se puchhiye to haqiqat pata chale
tanhaai mein to zaat kaa irfaan ho chukaa