gham-e-mohabbat mein dil ke daaghon se ru-kash-e-laala-zaar huun main — Tajwar Najibabadi

nazar bhar ke jo dekh sakte hain tujh ko
main un ki nazar dekhnaa chaahtaa huun

aah us ki be-kasi tu na jis ke saath ho
haae us ki bandagi jis kaa tu khudaa nahin

bardaasht dard-e-ishq ki dushvaar ho gai
ab zindagi bhi jaan kaa aazaar ho gai

uf vo nazar ki sab ke liye dil-navaaz hai
meri taraf uThi to talvaar ho gai

khudaa mujh ko tujh se hi mahrum kar de
jo kuchh aur tere sivaa chaahtaa huun

kahin rusvaa na hon ranginiyaan dard-e-mohabbat ki
miraa itnaa khayaal ai dida-e-khun-baar kar lenaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

main zindagi ke sabhi gham bhulaae baiThaa huun
tumhaare ishq se kitni mujhe sahulat hai

gham to gham hi raheinge 'zubair'
gham ke unvaan badal jaaeinge