kyuun na 'tanvir' phir izhaar ki jurat kiije — Tanveer Samani

farzi qisson jhuTi baaton se akasr
sachchaai ke qad ko naapaa kartaa huun

gharon mein qaid hain basti ke shorafaa
saDak par hain fasaadi aur ghunDe

apne kaandhe pe liye phirti hai ehsaas kaa bojh
zindagi kyaa kisi maqtal ki tamannaai hai

apni surat bhi kab apni lagti hai
aainon mein khud ko dekhaa kartaa huun

fikr ki aanch mein pighle to ye maalum huaa
kitne pardon mein chhupi zaat ki sachchaai hai

tumhaare baa'd khudaa jaane kyaa huaa dil ko
kisi se rabt baDhaane kaa hausla na huaa

dil ki dhaDkan bhi hai un ko naagavaar
un se kuchh kahne ki jurat kyaa karein

zinda rahne kaa haq milegaa use
jis mein marne kaa hausla hogaa

us ne bhi kai roz se khvaahish nahin oDhi
main ne bhi kai din se iraada nahin pahnaa

tamaam umr azaabon kaa silsila to rahaa
ye kam nahin hamein jiine kaa hausla to rahaa

bhaarat ke ai saputo himmat dikhaae jaao
duniyaa ke dil pe apnaa sikka biThaae jaao