tumhaare baa'd khudaa jaane kyaa huaa dil ko — Saifuddin Saif

husn jalva dikhaa gayaa apnaa
ishq baiThaa rahaa udaas kahin

'saif' andaaz-e-bayaan rang badal detaa hai
varna duniyaa mein koi baat nai baat nahin

shor din ko nahin sone detaa
shab ko sannaaTaa jagaa detaa hai

zindagi kis tarah kaTegi 'saif'
raat kaTti nazar nahin aati

ye aalaam-e-hasti ye daur-e-zamaana
to kyaa ab tumhein bhuul jaanaa paDegaa

hamein khabar hai vo mehmaan ek raat kaa hai
hamaare paas bhi saamaan ek raat kaa hai

ik lahar us ki aankh mein hai hausla-shikan
ik rang us ke chehre pe bahkaane vaalaa hai

kashti bhi nahin badli dariyaa bhi nahin badlaa
aur Dubne vaalon kaa jazba bhi nahin badlaa

hazaaron tamannaaon ke khuun se ham ne
kharidi hai ik tohmat-e-paarsaai

dil-e-sarshaar miraa chashm-e-siyah-mast tiri
jazba Takraa de na paimaane se paimaane ko

mushkil kaa saamnaa ho to himmat na haariye
himmat hai shart saahib-e-himmat se kyaa na ho

vo bulaate to hain mujh ko magar ai jazba-e-dil
shauq itnaa bhi na baDh jaae ki jaae na bane