mujh se kahte nahin bantaa ki sitam kam kiije — Tarkash Pradeep

tujhe gale se lagaa ke bhi dekhaa jaaegaa
abhi to mujh ko tiraa intizaar karnaa hai

yuun apne aap ko barbaad kartaa hai koi
ai mere dil tu samajhdaar hai nahin hai kyaa

husn hotaa hai kisi shai kaa koi apnaa hi
aur phir dekhne vaale ki nazar hoti hai

banaataa huun main tasavvur mein us kaa chehra magar
har ek baar nai kaaenaat banti hai

aur bhaTkeinge to kuchh aur nayaa dekheinge
ham to aavaara parinde hain hamaaraa kyaa hai

ab to main aur bhi buraa huun ki
ab ziyaada sudhar gayaa huun main

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

maddham maddham saans ki khush-bu miThe miThe dard ki aanch
rah rah ke karti hai bekal aur main likhtaa jaataa huun

khud banaa letaa huun main apni udaasi kaa sabab
DhunD hi leti hai 'shaahin' mujh ko viraani miri