saaqi sharaab Daal magar naap kar nahin — Ummaan Husain

baat aur bhi bigaDti hai nazrein churaane se
'ummaan' aaine mein bhi dekhaa karo kabhi

taajir huun khushbuon kaa so 'ummaan' is liye
phirtaa huun us ke shahr mein aksar yahaan vahaan

bahti havaa ne raat jo raundaa gulaab ko
gulshan mein baaghbaan pe ilzaam aa gayaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

is uljhan ko suljhaane ki kaun si hai tadbir likho
ishq agar hai jurm to mujrim raanjhaa hai yaa hiir likho

gesu o rukhsaar ki baatein karein
aao mil kar pyaar ki baatein karein

pahli cigarette pahlaa khvaab aur pahlaa ishq
in tinon mein ek bhi mujh ko yaad nahin

gham-gusaari pyaar hamdardi vafaa
ye dukaanein shahr ke baahar lagaa