gham-gusaari pyaar hamdardi vafaa — Imtiyaz Ahmad Qamar

yuun to qadam qadam pe khudaa sainkaDon mile
banda na mil sakaa koi bandon ke shahr mein

us 'qamar' ko hai khud ab apne hi chehre ki talaash
jis ko duniyaa ne kahaa aaj kaa gyaani hai yahi

jal-bujhi hogi koi aag kisi din us mein
be-sabab hi to nahin daagh 'qamar' mein aayaa

zabt-e-gham kaa mire andaaza bhalaa kyaa hotaa
main agar dasht na hotaa bhi to dariyaa hotaa

barg-e-aavaara ko ab apnaa pata yaad nahin
kyaa huaa tez havaaon ki paziraai mein

mire hi hisse mein azmat salib-o-daar ki thi
mujhe hi ahd kaa apne rasul honaa thaa

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

gham-o-alam bhi hain tum se khushi bhi tum se hai
navaa-e-soz mein tum ho sadaa-e-saaz mein tum

khugar-e-lazzat-e-aazaar thaa itnaa 'aatish'
dard bhi maangaa to pahle se sivaa maangaa thaa

dekhaa na tujhe ai rab ham ne haan duniyaa teri dekhi hai
saDkon par bhuke bachche bhi koThe par abla naari bhi