baat aur bhi bigaDti hai nazrein churaane se — Ummaan Husain

taajir huun khushbuon kaa so 'ummaan' is liye
phirtaa huun us ke shahr mein aksar yahaan vahaan

bahti havaa ne raat jo raundaa gulaab ko
gulshan mein baaghbaan pe ilzaam aa gayaa

saaqi sharaab Daal magar naap kar nahin
hoti hai sharmsaar mohabbat usuul se

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

aur bhi to hain zamaane mein tumhaare aashiq
ek main hi tumhein kyaa qaabil-e-ilzaam milaa