gumāñ kis par kareñ suufī idhar hai us taraf vaa.iz — Shayari Of Unknown

siine meñ ābād hamesha rahtī hai
pahlī mohabbat yaad hamesha rahtī hai

maiñ ro ro ke kahne lagā dard-e-dil
vo muñh pher kar muskurāne lagā

guzar to jā.egī tere baġhair bhī lekin
bahut udaas bahut be-qarār guzregī

mahfil meñ chaar chāñd lagāne ke bāvajūd
jab tak na aap aa.e ujālā na ho sakā

ḳhush-āmdīd vo aayā hamārī chaukhaT par
bahār jis ke qadam kā tavāf kartī hai

maiñ ojhal ho ga.ī maañ kī nazar se
galī meñ jab koī bārāt aa.ī

sau sau umīdeñ bañdhtī hai ik ik nigāh par
mujh ko na aise pyaar se dekhā kare koī

dil nā-umīd to nahīñ nākām hī to hai
lambī hai ġham kī shaam magar shaam hī to hai

kabhī kisī ko mukammal jahāñ nahīñ miltā
kahīñ zamīn kahīñ āsmāñ nahīñ miltā

rahī na tāqat-e-guftār aur agar ho bhī
to kis umiid pe kahiye ki aarzū kyā hai

na būjho āsmāñ par tum sitāre
hamārī aah kī chingāriyāñ haiñ

yahī hai zindagī kuchh ḳhvāb chand ummīdeñ
inhīñ khilaunoñ se tum bhī bahal sako to chalo