un ko bhule hue apne hi sitam yaad aae — Unknown

log kaanTon se bach ke chalte hain
main ne phulon se zakhm khaae hain

dil TuTne se thoDi si taklif to hui
lekin tamaam umr ko aaraam ho gayaa

duniyaa mein vahi shakhs hai taazim ke qaabil
jis shakhs ne haalaat kaa rukh moD diyaa ho

miri namaaz-e-janaaza paDhi hai ghairon ne
mare the jin ke liye vo rahe vazu karte

ye hamin hain ki tiraa dard chhupaa kar dil mein
kaam duniyaa ke ba-dastur kiye jaate hain

jin ke kirdaar se aati ho sadaaqat ki mahak
un ki tadris se patthar bhi pighal sakte hain

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

daam-bar-dosh phirein chaahe vo gesu bar-dosh
said ban ban ke hamin ne unhein sayyaad kiyaa

kis kis tarah ki dil mein guzarti hain hasratein
hai vasl se ziyaada mazaa intizaar kaa

ek bulbul bhi chaman mein na rahi ab ki fasal
zulm aisaa hi kiyaa tu ne ai sayyaad ki bas

malun hon khaak juun aaina munh par
tiri surat mujhe aati hai jab yaad