log kaanTon se bach ke chalte hain — Unknown

dil TuTne se thoDi si taklif to hui
lekin tamaam umr ko aaraam ho gayaa

duniyaa mein vahi shakhs hai taazim ke qaabil
jis shakhs ne haalaat kaa rukh moD diyaa ho

miri namaaz-e-janaaza paDhi hai ghairon ne
mare the jin ke liye vo rahe vazu karte

ye hamin hain ki tiraa dard chhupaa kar dil mein
kaam duniyaa ke ba-dastur kiye jaate hain

ye duniyaa gham to deti hai sharik-e-gham nahin hoti
kisi ke duur jaane se mohabbat kam nahin hoti

jin ke kirdaar se aati ho sadaaqat ki mahak
un ki tadris se patthar bhi pighal sakte hain

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kahaan milegi misaal meri sitamgari ki
ki main gulaabon ke zakhm kaanTon se si rahaa huun

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

sabaa bhi duur khaDi apne haath malti hai
tiri gali mein kisi kaa guzar nahin hargiz

tabassum ki sazaa kitni kaDi hai
gulon ko khil ke murjhaanaa paDaa hai

ham gae the us se karne shikva-e-dard-e-firaaq
muskuraa kar us ne dekhaa sab gila jaataa rahaa