ghamon par us ke kabhi e'tibaar mat karnaa — Usman Minai

tumhaare chehre ki saari nasein tani hui hain
tumhaare haath mein kyaa aaina diyaa gayaa hai

koi bashar kabhi paani banaa nahin saktaa
khudaa ke hone kaa pahlaa subut paani hai

didaar ke sikke jo zaraa bhikh mein maange
to us ne kahaa jaao jumeraat ko aanaa

neze ki nok teraa tah-e-dil se shukriya
ab tak giraa nahin hai miraa sar zamin par

ghazlon ke she'r likhne se pahle hazaar baar
ham dekhte hain aap ki tasvir ki taraf

nishaan kyon DhunDhte ho ungliyon ke
qazaa aai thi dastaane pahan kar

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

aangan aangan khuun ke chhinTe chehra chehra be-chehra
kis kis ghar kaa zikr karun mein kis kis ke sadmaat likhun

is zamaane mein na ho kyunkar hamaaraa dil udaas
dekh kar ahvaal-e-aalam uDte jaate hain havaas

ye hamin hain ki tiraa dard chhupaa kar dil mein
kaam duniyaa ke ba-dastur kiye jaate hain