nishaan kyon DhunDhte ho ungliyon ke — Usman Minai

tumhaare chehre ki saari nasein tani hui hain
tumhaare haath mein kyaa aaina diyaa gayaa hai

koi bashar kabhi paani banaa nahin saktaa
khudaa ke hone kaa pahlaa subut paani hai

didaar ke sikke jo zaraa bhikh mein maange
to us ne kahaa jaao jumeraat ko aanaa

neze ki nok teraa tah-e-dil se shukriya
ab tak giraa nahin hai miraa sar zamin par

ghazlon ke she'r likhne se pahle hazaar baar
ham dekhte hain aap ki tasvir ki taraf

ghamon par us ke kabhi e'tibaar mat karnaa
vo pyaaz kaaT ke aansu nikaal letaa hai

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kahaan milegi misaal meri sitamgari ki
ki main gulaabon ke zakhm kaanTon se si rahaa huun

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kaanTe se bhi nichoD li ghairon ne bu-e-gul
yaaron ne bu-e-gul se bhi kaanTaa banaa diyaa

dil par pahan liyaa hai vo gajre ke jaisaa shakhs
lekin gale kaa haar nahin kar rahaa huun main

charaag chaand shafaq shaam phuul jhiil sabaa
churaain sab ne hi kuchh kuchh shabaahatein teri