aise baDhe ki manzilein raste mein bichh gaiin — Wazir Agha

vo khush-kalaam hai aisaa ki us ke paas hamein
tavil rahnaa bhi lagtaa hai mukhtasar rahnaa

khuli kitaab thi phulon-bhari zamin meri
kitaab meri thi rang-e-kitaab us kaa thaa

itnaa na paas aa ki tujhe DhunDte phirein
itnaa na duur jaa ke hama-vaqt paas ho

yaa abr-e-karam ban ke baras khushk zamin par
yaa pyaas ke sahraa mein mujhe jiinaa sikhaa de

safar tavil sahi haasil-e-safar ye hai
vahaan ko bhuul gae aur yahaan ko pahchaanaa

dhuup ke saath gayaa saath nibhaane vaalaa
ab kahaan aaegaa vo lauT ke aane vaalaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

safar mein aise kai marhale bhi aate hain
har ek moD pe kuchh log chhuT jaate hain

yuun to maujud apne ghar mein hai
aadmi mustaqil safar mein hai

aur koi duniyaa hai teri jis ki khoj karun
zehn mein phir ik samt bikheri raahguzar Daali

khalish-e-tir-e-be-panaah gai
lijiye un se rasm-o-raah gai