aur koi duniyaa hai teri jis ki khoj karun — Mohammad Ahmad Ramz

kaun puchhe mujh se meri gosha-giri kaa sabab
kaun samjhe dar kabhi divaar kar lenaa miraa

'ramz' adhure khvaabon ki ye ghaTti baDhti chhaanv
tum se dekhi jaae to dekho mujh se na dekhi jaae

us kaa tarkash khaali hone vaalaa hai
mere naam kaa tiir hai kitne tiron mein

harf ko lafz na kar lafz ko izhaar na de
koi tasvir mukammal na banaa us ke liye

tum aa gae ho tum mujh ko zaraa sambhalne do
abhi to nashsha saa aankhon mein intizaar kaa hai

ab ke vasl kaa mausam yunhi bechaini mein biit gayaa
us ke honTon par chaahat kaa phuul khilaa bhi kitni der

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

yuun to maujud apne ghar mein hai
aadmi mustaqil safar mein hai

safar mein aise kai marhale bhi aate hain
har ek moD pe kuchh log chhuT jaate hain

do chaar manzilon hi pe saansein ukhaD gaiin
ghuTnon pe hai zavaal pata chal gayaa mujhe