main badaltaa huun roz apnaa hadaf — Zahoor Minhas

fikr-e-tajdid-e-hijr hai varna
kab mujhe vasl ki zarurat hai

ye to insaaniyat ko Thokar hai
aadmi aadmi kaa naukar hai

vo thak gai thi bhiiD mein chalte hue 'zahur'
us ke badan pe an-ginat aankhon kaa bojh thaa

koi bhi hal nahin udaasi kaa
mujh se kamre ne baarhaa puchhaa

tamaam shahr mein baarish ki dhaak baiTh gai
jo uD rahi thi havaaon mein khaak baiTh gai

gaaDi mein bhi ghar ko soche jaataa huun
gaaDi aage aur main pichhe jaataa huun

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

jab fikron par baadal se manDlaate honge
insaan ghaT kar saae se rah jaate honge

lab-e-khirad se yahi baar baar niklegaa
nikaalne hi se dil kaa ghubaar niklegaa

pyaar se sarshaar karnaa pyaar se chhunaa mujhe
chaak-dil insaan Thahraa TuuTe pyaale ki tarah

koi khat-vat nahin phaaDaa koi tohfa nahin toDaa
ki vo dekhe to khud soche ki dil toDaa nahin toDaa