chhoTi si baat pe khush honaa mujhe aataa thaa — Zehra Nigaah

dekho vo bhi hain jo sab kah sakte the
dekho un ke munh par taale ab bhi hain

uTho ki jashn-e-khizaan ham manaaein ji bhar ke
bahaar aae gulistaan mein kab khudaa jaane

jo dil ne kahi lab pe kahaan aai hai dekho
ab mahfil yaaraan mein bhi tanhaai hai dekho

kahaan ke ishq-o-mohabbat kidhar ke hijr o visaal
abhi to log taraste hain zindagi ke liye

divaanon ko ab vusat-e-sahraa nahin darkaar
vahshat ke liye saaya-e-divaar bahut hai

dekhte dekhte ik ghar ke rahne vaale
apne apne khaanon mein baT jaate hain

gham hai na ab khushi hai na ummid hai na yaas
sab se najaat paae zamaane guzar gae

nahin nahin main bahut khush rahaa huun tere baghair
yaqin kar ki ye haalat abhi abhi hui hai

main jise DhunDne niklaa thaa use paa na sakaa
ab jidhar ji tiraa chaahe mujhe khushbu le jaa

aisi tasvir banaa rote hue khush bhi lagun
gham ki tarsil to ho gham kaa tamaasha na bane

sharaab o saaqi-e-mah-ru jo saath hon 'bedaar'
to khush-numaa hai shab-e-maahtaab mein dariyaa

gulshan-e-dahr se khushbu ki tarah guzraa main
sab ko mahkaayaa magar apni numaaish nahin ki