abr-e-aavaara se mujh ko hai vafaa ki ummid — Zia Jalandhari

rang baatein karein aur baaton se khushbu aae
dard phulon ki tarah mahke agar tu aae

himmat hai to buland kar aavaaz kaa alam
chup baiThne se hal nahin hone kaa masala

ishq mein bhi koi anjaam huaa kartaa hai
ishq mein yaad hai aaghaaz hi aaghaaz mujhe

ye aansu ye pashemaani kaa izhaar
mujhe ik baar phir bahkaa gai ho

tu koi sukhaa huaa patta nahin hai ki jise
jis taraf mauj-e-havaa chaahe uDaa kar le jaae

buraa na maan 'ziyaa' us ki saaf-goi kaa
jo dard-mand bhi hai aur be-adab bhi nahin

pyaaso raho na dasht mein baarish ke muntazir
maaro zamin pe paanv ki paani nikal paDe

qimat mire sone ki vahaan khaak lagegi
ho khaak ki qimat jahaan sone k baraabar

hairat se taktaa hai sahraa baarish ke nazraane ko
kitni duur se aai hai ye ret se haath milaane ko

aankhon mein damak uTThi hai tasvir-e-dar-o-baam
ye kaun gayaa mere baraabar se nikal kar

baadalon ne aaj barsaayaa lahu
amn kaa har faakhta rone lagaa

koi barsaa na sar-e-kisht-e-vafaa
kitne baadal guhar-afshaan guzre