Shayari Of Badr Muneer

agar hai niiñd na aane kā āriza tujh ko
to bed pe leT ke fauran koī kitāb uThā

kunj-e-hairat se chale dasht-e-ziyāñ tak laa.e
kaun lā saktā hai ham dil ko jahāñ tak laa.e

jab vasl kā aa.egā tire saath sanam din
us din ko haqīqat meñ kahūñgā maiñ janam-din

charāġh andar kī sāzishoñ se bujhe hue haiñ
aur is kā ilzām bhī havā par chalā gayā hai

paḌ jaate haiñ kitne chhāle hāthoñ meñ
aate haiñ phir chand nivāle hāthoñ meñ

kyā ḳhabar kaun sā rasta tirī jānib nikle
be-irāda bhī ka.ī baar safar karte haiñ

muskurā kar agar vo dekhe to
aa.ine par nishān paḌ jaa.e

ek ummīd ke sahāre par
kitnī tāḳhīr dekh lete haiñ

jo ahl-e-‘ishq haiñ dete haiñ zor burger par
jo ahl-e-husn haiñ sapne dinner ke dekhte haiñ

karnī paḌ jaa.e vazāhat pe vazāhat lekin
ham tirī baat kī tardīd nahīñ kar sakte

zamīñ pe sirf utārā nahīñ 'munīr' us ne
phir us ke baa'd hamārā ḳhayāl bhī rakkhā

ye ā.īnoñ ke haiñ yā naqs mere
bigaḌte jā rahe haiñ 'aks mere