Shayari Of Deepak Purohit

vatan-parastī hamārā maz.hab haiñ jism-o-jāñ mulk kī amānat
kareñge barpā qahr adū par rahegā daa.im vatan salāmat

ye kaisī bad-duā dī hai kisī ne
samundar huuñ magar khārā huā huuñ

ḳhushāmad tābedārī minnat-o-ḳhidmat sujūd-e-husn
azal se dīdanī hai bebasī-o-ājizī-e-ishq

lamhāt-e-vasl yaad jo aa.e shab-e-firāq
yak-laḳht surḳh ho ga.e aariz be-iḳhtiyār

"maiñ muddat se tirī aamad kā yuuñ aalam sajā.e huuñ ajab hai be-ḳhudī dahlīz pe nazreñ jamā.e huuñ huī tārīkiyāñ ruḳhsat munavvar ziist hai merī tumhārī yaad ke jugnū maiñ palkoñ par sajā.e huuñ phirāyā dar-ba-dar be-kal jahāñ meñ ḳhvāb-o-ḳhvāhish ne musalsal hai sukūñ armān-o-hasrat ko miTā.e huuñ mahaktī kaifiyat se hai mo.attar zindagī merī tumhārī ruuh kī ḳhushbū meñ sāñsoñ meñ basā.e huuñ ghane ḳhud-ġharzī-o-matalab-parastī ke añdheroñ meñ vasī.a imdād aur ḳhidmāt kī sham.eñ jalā.e huuñ"

"na lāzim tavaqqo.a hai ahal-e-mahal se karo ziist shādāb ilm-o-amal se hijāb-o-hayā sochte rah ga.e haiñ milī ishq meñ kāmyābī pahal se yuuñ nākāmiyāñ ham-safar haiñ musalsal ki le de ke ummīd hai ab ajal se hayāt-o-fanā kā ye kyā silsila hai nahīñ raaz afshāñ huā ye azal se yatīmī-o-lā-vārsī bevgī ke ba-juz kuchh na hāsil hai jañg-o-jadal se"

"uf ye dil hādsoñ se ubhartā nahīñ kyuuñ ye kambaḳht muqaddar sañvartā nahīñ ek ham haiñ ki ham par ghaḌoñ paḌ gayā ek vo haiñ ki un par Thahartā nahīñ vaañ to fitrat meñ shāmil hai aur ham pe yaañ ġhairiyat kā gumāñ tak guzartā nahīñ thā muqaddas vo mānind-e-jannat kabhī kū-e-jānāñ se ab maiñ guzartā nahīñ kis kashākash meñ haiñ zindagī-o-qazā saañs chaltī nahīñ dam nikaltā nahīñ"

"to kyā rābta phir ḳhudā kā bashar se ta.alluq nahīñ jab duā kā asar se jo pūchhā havā se kyuuñ mahkī huī ho kahā us ne aa.ī huuñ ho kar udhar se rah-e-ishq dushvār hai kis qadar ye kabhī pūchh dekho to mujh dar-ba-dar se yuuñ mahv-e-safar huuñ tirī justujū meñ nazar merī aage hai shams-o-qamar se rahā be-ḳhabar ahl-e-ġhurbat ke ġham se so ḳhud gir rahā huuñ maiñ apnī nazar se ki maañ ḳhvāb meñ māthā sahlā rahī thī Darūñ kyā maiñ ab bad-duā bad-nazar se"

siyah-baḳhtī kā saaya dīda-o-dil par hai yuuñ taarī
ki ik muddat se mere din bhī kajlā.e hue se haiñ

ḳhūb-rū kaun ye aayā chaman meñ aaj ki yaañ
sharm se surḳh hue jaate haiñ ye phuul sabhī

hai ḳhuub manzar-e-chāra-garī ki ham ne yahāñ
duā ke dar pe hai dekhā davā ko sajde meñ

ki hai muḳhtasar dāstāñ ishq kī
gale mil ke koī gale paḌ gayā