khushaamad taabedaari minnat-o-khidmat sujud-e-husn — Deepak Purohit

ye kaisi bad-duaa di hai kisi ne
samundar huun magar khaaraa huaa huun

azal se barse hai paakizgi falak se yahaan
numaayaan hove hai phir shakl-e-bahan mein vo yahaan

kahaan jurat in ashkon ki ki dehri aankh ki laanghein
hai pahraa zabt kaa aisaa ki sahme sahme rahte hain

yuun guftugu-e-ulfat dilchasp ham kareinge
aankhon se tum kahoge aankhon se ham suneinge

havas-e-zar ne kiyaa rishton kaa jo haal na puchh
khuun rulaataa hai yahaan khuun kaa rishta apnaa

khub-ru kaun ye aayaa chaman mein aaj ki yaan
sharm se surkh hue jaate hain ye phuul sabhi

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

'ishq mein koi bhi sarhad hamein manzur nahin
'ishq sarhad ke to us paar bhi ho saktaa

dhuum naalon ne yahaan tak to machaai hai 'sharar'
bakht-e-khufta ko dil-e-zaar ne sone na diyaa

mohabbat jurm hai to phir sazaa bhi ek jaisi ho
koi rusvaa koi mashhur ho aisaa nahin hotaa

ki hai koi hasin khataa har khataa ke saath
thoDaa saa pyaar bhi mujhe de do sazaa ke saath