na laazim tavaqqoa hai ahal-e-mahal se — Deepak Purohit

"main muddat se tiri aamad kaa yuun aalam sajaae huun ajab hai be-khudi dahliz pe nazrein jamaae huun hui taarikiyaan rukhsat munavvar ziist hai meri tumhaari yaad ke jugnu main palkon par sajaae huun phiraayaa dar-ba-dar be-kal jahaan mein khvaab-o-khvaahish ne musalsal hai sukun armaan-o-hasrat ko miTaae huun mahakti kaifiyat se hai moattar zindagi meri tumhaari ruuh ki khushbu mein saanson mein basaae huun ghane khud-gharzi-o-matalab-parasti ke andheron mein vasia imdaad aur khidmaat ki shamein jalaae huun"

"uf ye dil haadson se ubhartaa nahin kyuun ye kambakht muqaddar sanvartaa nahin ek ham hain ki ham par ghaDon paD gayaa ek vo hain ki un par Thahartaa nahin vaan to fitrat mein shaamil hai aur ham pe yaan ghairiyat kaa gumaan tak guzartaa nahin thaa muqaddas vo maanind-e-jannat kabhi ku-e-jaanaan se ab main guzartaa nahin kis kashaakash mein hain zindagi-o-qazaa saans chalti nahin dam nikaltaa nahin"

"to kyaa raabta phir khudaa kaa bashar se taalluq nahin jab duaa kaa asar se jo puchhaa havaa se kyuun mahki hui ho kahaa us ne aai huun ho kar udhar se rah-e-ishq dushvaar hai kis qadar ye kabhi puchh dekho to mujh dar-ba-dar se yuun mahv-e-safar huun tiri justuju mein nazar meri aage hai shams-o-qamar se rahaa be-khabar ahl-e-ghurbat ke gham se so khud gir rahaa huun main apni nazar se ki maan khvaab mein maathaa sahlaa rahi thi Darun kyaa main ab bad-duaa bad-nazar se"

"aakhiri hal thaa yahi pesh-e-nazar jaane diyaa ek gahri saans li phir khvaab mar jaane diyaa saarbaanaa de gavaahi mujh ko pyaari thi anaa rakh liyaa zaad-e-safar aur ham-safar jaane diyaa hazrat-e-naaseh ki khush-uftaadgi pe daad hai khud jidhar se aae the sab ko udhar jaane diyaa is harim-e-naaz mein yuun be-mahaabaa guftugu kuchh bharam rakkhaa to hotaa tum ko gar jaane diyaa tujh ko rokaa jaa rahaa thaa raushni thi jab talak shaam ke Dhalte samay suraj ko ghar jaane diyaa aankh sapne dekhti thi aansuon se kyon bhari chaahti to puchh leti main magar jaane diyaa dostaa qismat na ho to koshishein bekaar hain sabr kaa paimaana ham ne khud hi bhar jaane diyaa dil musir thaa baarhaa kuchh jaanchne ko ruk gae aakhirash us ne hamein baar-e-digar jaane diyaa"

"aisaa to yahaan kuchh bhi nahin hadd-e-nazar tak ham ko to pahunchnaa thaa kisi khvaab-nagar tak ab paanv nahin raah mein dil thakne lagaa hai lekin hamein chalnaa to hai anjaam-e-safar tak ham shor bhi sunte hain samaaat se bahut kam aavaaz bhi jaati hai to bas hadd-e-nazar tak mumkin hai main ab sabr kaa ye peD giraa duun jab haath pahunchtaa hi nahin shaakh-e-samar tak ham apne hi mausam se parakhte hain jahaan ko maahaul kaa lete hi nahin koi asar tak main apne hi andar ki taraf chikh rahaa huun ab dekhiye jaati hai ye aavaaz kidhar tak"

"tirgi shama bani raahguzar mein aai saaat ik aisi bhi kal apne safar mein aai jis jagah chehra hi meyaar-e-vafaa Thahraa hai khaak hi khaak vahaan dast-e-hunar mein aai teri nazron mein thi duniyaa to yahi kyaa kam thaa hashr ye hai ki tu duniyaa ki nazar mein aai baar-haa yaaron ne saahil se kahaa thaa ham hain baar-haa naav magar apni bhanvar mein aai zindagi samjhun ise yaa ki ise maut kahun vo jo mehmaan ki surat mire ghar mein aai yuun bhi taarikh ki taarikh raqam hoti hai nikli taarikh mahal se to khanDar mein aai khvaab hi khvaab ki taabir huaa to jaanaa zindagi kyuun kisi aankhon ke asar mein aai shama jalte hi bujhi aur dhuaan aisaa uThaa lazzat-e-shaam yahaan khvaab-e-sahar mein aai zindagi kuchh hai 'ataa' sher-o-adab hai kuchh aur ye do-rangi ki vabaa kaisi hunar mein aai"

"tire jamaal se ham runumaa nahin hue hain chamak rahe hain magar aaina nahin hue hain dhaDak rahaa hai tu ik ism ki hai ye barakat vagarna vaaqiye is dil mein kyaa nahin hue hain bataa na paaein to khud tum samajh hi jaao ki ham bilaa javaaz to be-maajraa nahin hue hain tiraa kamaal ki aankhon mein kuchh zabaan pe kuchh hamein to moajize aise ataa nahin hue hain ye mat samajh ki koi tujh se munharif hi nahin abhi ham ahl-e-junun lab-kushaa nahin hue hain ba-naam-e-zauq-e-sukhan khud-numaai aap karein ham is maraz mein abhi mubtalaa nahin hue hain hami vo jin kaa safar maavaraa-e-vaqt-o-vajud hami vo khud se kabhi jo rihaa nahin hue hain khud-aagahi bhi khaDi maangti hai apnaa hisaab junun ke qarz bhi ab tak adaa nahin hue hain kisi ne dil jo dukhaayaa kabhi to ham 'irfaan' udaas ho gae lekin khafaa nahin hue hain"

"ba-zom-e-aql ye kaisaa gunaah main ne kiyaa ik aainaa thaa usi ko siyaah main ne kiyaa ye shahr-e-kam-nazaraan ye dayaar-e-be-hunaraan kise ye apne hunar kaa gavaah main ne kiyaa harim-e-dil ko jalaane lagaa thaa ek khayaal so gul use bhi ba-yak sard aah main ne kiyaa vahi yaqin rahaa hai javaaz-e-ham-safari jo gaah us ne kiyaa aur gaah main ne kiyaa bas ek dil hi to hai vaaqif-e-rumuz-e-hayaat so shahr-e-jaan kaa use sarbaraah main ne kiyaa har ek ranj usi baab mein kiyaa hai raqam zaraa saa gham thaa jise be-panaah main ne kiyaa ye raah-e-ishq bahut sahl ho gai jab se hisaar-e-zaat ko paivand-e-raah main ne kiyaa ye umr ki hai basar kuchh ajab tavaazun se tiraa huaa na hi khud se nibaah main ne kiyaa khirad ne dil se kahaa tu junun-sifat hi sahi na puchh us ki ki jis ko tabaah main ne kiyaa"

"faqat saje hue divaar-o-dar kaa kyaa matlab jahaan sukun nahin aise ghar kaa kyaa matlab kisi ke kaam na aae to zar kaa kyaa matlab na phal na chhaanv hai aise shajar kaa kyaa matlab na raaston kaa Thikaana na manzilon kaa pataa tire baghair mire is safar kaa kyaa matlab koi hayaat ke maani bataa ke samjhaae tavil kyaa hai bhalaa mukhtasar kaa kyaa matlab"