hai khuub manzar-e-chaara-gari ki ham ne yahaan — Deepak Purohit

khushaamad taabedaari minnat-o-khidmat sujud-e-husn
azal se didani hai bebasi-o-aajizi-e-ishq

ye kaisi bad-duaa di hai kisi ne
samundar huun magar khaaraa huaa huun

azal se barse hai paakizgi falak se yahaan
numaayaan hove hai phir shakl-e-bahan mein vo yahaan

kahaan jurat in ashkon ki ki dehri aankh ki laanghein
hai pahraa zabt kaa aisaa ki sahme sahme rahte hain

yuun guftugu-e-ulfat dilchasp ham kareinge
aankhon se tum kahoge aankhon se ham suneinge

khub-ru kaun ye aayaa chaman mein aaj ki yaan
sharm se surkh hue jaate hain ye phuul sabhi

zakhm khaa kar bhi jo duaaein de
kaun us kaa muqaabla karegaa

ye imtiyaaz zaruri hai ab ibaadat mein
vahi duaa jo nazar kar rahi hai lab bhi karein

takmil-e-aarzu se bhi hotaa hai gham kabhi
aisi duaa na maang jise bad-duaa kahein

usi ke honTon ke phuul baab-e-qubul chumein
so ham uThaa laaein ab ke harf-e-duaa usi kaa

kisi ne khvaab mein aakar mujhe ye hukm diyaa
tum apne ashk bhi bhejaa karo duaaon ke saath

mere daaman mein agar kuchh na rahegaa baaqi
agli naslon ko duaa de ke chalaa jaaungaa