Ghazal

"giton kaa shahr hai ki nagar soz-o-saaz kaa qalb-e-shikasta aur ye aalam gudaaz kaa chaaron taraf saji hain dukaanein khulus ki chamkaa hai kaarobaar har ik hilaa-saaz kaa vo chaahe khvaab ho ki haqiqat magar kabhi ehsaan uThaaegaa na libaas-e-majaaz kaa jis tarah chaahaa jaae hai chaahaa nahin abhi andesha jaan khaae hai ifshaa-e-raaz kaa bahrupiyaa hai koi phire hai nagar nagar qaatil kaa ruup dhaare kabhi chaarasaaz kaa yuun hanste hanste daar-e-fanaa se chalaa hai vo jaise safar nasib ho arz-e-hijaaz kaa 'aabid' ghamon ki dhuup mein jalnaa hai chaar din bas qissa mukhtasar hai ye umr-e-daraaz kaa"

"sharik-e-aalam-e-kaif-o-surur main bhi thaa ki raat jashn mein tere huzur main bhi thaa ajiib vaqt thaa duniyaa qarib thi mere ghazab ye thaa tire daaman se duur main bhi thaa ghamon ke ghere mein jab raqs kar rahi thi hayaat tamaash-bin ki tarah be-shuur main bhi thaa na ruknaa raah mein shart-e-safar mein shaamil thaa thakan se varna bahut chuur chuur main bhi thaa utar rahaa thaa lahu kis balaa kaa aankhon mein tire khayaal mein us dam zarur main bhi thaa guzarte vaqt ne pahre baiThaa diye 'aabid' khataaein un ki na thiin be-qusur main bhi thaa"

"safar mein aise kai marhale bhi aate hain har ek moD pe kuchh log chhuT jaate hain ye jaan kar bhi ki patthar har ek haath mein hai jiyaale log hain shishon ke ghar banaate hain jo rahne vaale hain log un ko ghar nahin dete jo rahne vaalaa nahin us ke ghar banaate hain jinhein ye fikr nahin sar rahe rahe na rahe vo sach hi kahte hain jab bolne pe aate hain kabhi jo baat kahi thi tire taalluq se ab us ke bhi kai matlab nikaale jaate hain"

"kaar-naama ai gham-e-dil kuchh tiraa ye kam nahin bah gae aankhon se dariyaa aur aankhein nam nahin saaf thaa har lafz us ki be-badal taqrir kaa phir lahu ne naqsh jo chhoDe hain vo mubham nahin har zamaane mein nahin pahchaannaa mushkil unhein sar qalam hote raheinge un ke lekin gham nahin karbalaa hi ne kiye hain murtasim dil par nuqush varna is duniyaa mein gham ki vaardaatein kam nahin dil hi dil vo bhigi lakDi ki tarah sulgaa kiyaa us ke chehre se to lagtaa thaa ki koi gham nahin kaifiyat kaisi ajab is shahr ki yaadon ki hai garm hai aatish nahin aur sard hai shabnam nahin ik alag tahzib hai tanhaaiyon ke shahr ki ek hi aalam hamesha aur koi mausam nahin phir rahe hain log phir haathon mein sang-reze liye aur apne sar mein saudaa is ghaDi kuchh kam nahin ham se 'aabid' apne rahbar ko shikaayat ye rahi aankh munde un ke pichhe chalne vaale ham nahin"

"ye mere shahr kaa ik aur haadisa hogaa vo kal yahaan miraa mehmaan ban chukaa hogaa talaash mein huun kisi ki main kab se sargardaan usi tarah koi mujh ko bhi DhunDhtaa hogaa miri tarah se koi chikhtaa hai raahon mein miri tarah koi duniyaa ko dekhtaa hogaa lagaa ke aaegaa chehra koi nayaa shab mein vo jis ko baiTh ke din mein taraashtaa hogaa shanaasaa chehre bhi lagne lage hain begaane ab apnaa vaqt hi shaayad badal rahaa hogaa udaas udaas saa khoyaa huaa saa rahtaa hai kuchh us se bhi koi kah kar badal gayaa hogaa thakaa thakaa saa usi dar pe aa ke baiThaa thaa na puchhaa hogaa kisi ne to chal diyaa hogaa jahaan pahunch ke qadam Dagmagaae hain sab ke usi maqaam se ab apnaa raasta hogaa"

"jab jab bhi dekhiye use khun-baar si lage duniyaa hamesha barsar-e-paikaar si lage har har nafas pe rang badalti hai zindagi ik phuul si lage hai kabhi khaar si lage chehra hai mere dost kaa yaa koi aaina dekhun ulaT-palaT ke to bhi aarsi lage aadat si paD gai hai use bolne ki tez vo baat bhi kare hai to takraar si lage tum saath ho to ham bhi bayaabaan ko ghar karein ye sakht dhuup saaya-e-divaar si lage har har qadam pe jaise ki biktaa ho aadmi basti tamaam misr ke baazaar si lage 'aabid' tamaam shahr pe aalam hai kaun saa har ek shakl naqsh-ba-divaar si lage"

"safar kaa shauq na manzil ki justuju baaqi musaafiron ke badan mein nahin lahu baaqi tamaam raat havaaon kaa gasht jaari thaa savere tak na rahaa koi hu-ba-hu baaqi sabhi tarah se taaaruf to ho gayaa un kaa rahi hai ab to mulaaqaat ru-ba-ru baaqi jo bhiiD bikhre to dekhun talab ye kaisi hai dayaar-e-ghair mein hai kis ki justuju baaqi vahi nazaare vahi garmi-e-sukhan hai magar na hi vo baat na vo tarz-e-guftugu baaqi zamaana mujh se judaa ho gayaa zamaana huaa rahaa hai ab to bichhaDne ko mujh se tu baaqi usi lihaaz kaa 'aabid' malaal hai ham ko rahaa na aaj jo dauraan-e-guftugu baaqi"

"haadson se be-khabar the log dharti par tamaam aasmaan ki nilgun aankhon mein the manzar tamaam rafta rafta rasm-e-sang-baari jahaan se uTh gai dhire dhire ho gae basti ke sab patthar tamaam tishna-lab dharti pe jab bahtaa hai pyaason kaa lahu muddaton maqtal mein sar kham rahte hain khanjar tamaam zindagi bikhri hui hai is tarah fōtpath par bastiyaan aabaad hain aur log hain be-ghar tamaam shaahraahein dafatan shoale ugalne lag gaiin ghar ki jaanib chal paDaa hai shahr ghabraa kar tamaam subh ke saare ujaale raaston mein kho gae shab ke andhiyaaron mein gum hain shaam ke manzar tamaam ab kahaan vo log vo raunaq vo naghme vo fazaa shahr ki galiyaan hain suuni suune baam-o-dar tamaam"

"main apne jism mein kuchh is tarah se bikhraa huun ki ye bhi kah nahin saktaa main kaun huun kyaa huun unhein khushi hai isi baat se ki zinda huun main un ki daaein hatheli ki ek rekhaa huun main pi gayaa huun kai aansuon ke sail-e-ravaan main apne dil ko samundar banaae baiThaa huun vo mere dost jo ek ek kar ke duur hue main un ko aaj bhi apne qarib paataa huun muhit karne ki koshish fuzul hai mujh ko nadi kaa chhor nahin huun main bahtaa dariyaa huun mujhi pe pheinke hai patthar jo koi aataa hai ki jaise main tiri khiDki kaa koi shisha huun"

"pardes mein huun aur ghani tirgi to hai par mutmain huun raat tire shahr ki to hai dharti pe aa raheingi abhi sab bulandiyaan chaTTaan dhire dhire khisakne lagi to hai is kaa to gham nahin ki mukhaalif sabhi hue chubhti hui si baat bhi ham ne kahi to hai phailaa ke haath pair na so jaae chaandni saahil hai rut javaan hai aur raat bhi to hai kholo na khiDkiyaan ki saveraa nahin huaa bujhte hue diye hain abhi raushni to hai tanhaai mein ye kaun hai chaunkaa gayaa mujhe vo aadmi nahin na sahi par koi to hai"

"ye hai aab-e-ravaan na Thahregaa umr kaa kaarvaan na Thahregaa chhoD di hai jagah sutunon ne sar pe ab saaebaan na Thahregaa ret par hai asar havaaon kaa koi naam-o-nishaan na Thahregaa har qadam jo tumhaari samt uThaa sai-e-raaegaan na Thahregaa marhala aa gayaa tasaadum kaa faasla darmiyaan na Thahregaa dil kaa saudaa hai kaar-e-dil-daaraan farq-e-sud-o-ziyaan na Thahregaa kyon sunaate ho sab ko haal apnaa har koi raazdaan na Thahregaa chhoD degi zamin mehvar ko mustaqil aasmaan na Thahregaa apni aankhon mein aaj use bhar lo der tak ye samaan na Thahregaa juz teri mahfilon ke aur kahin 'aabid'-e-naa-tavaan Thahre Thahregaa"