Ghazal

"main rang-e-aasmaan kar ke sunahri chhoD detaa huun vatan ki khaak le kar ek muTThi chhoD detaa huun ye kyaa kam hai ki haqq-e-khud-parasti chhoD detaa huun tumhaaraa naam aataa hai to kursi chhoD detaa huun main roz-e-jashn ki tafsil likh kar rakh to letaa huun magar us jashn ki taarikh khaali chhoD detaa huun bahut mushkil hai mujh se mai-parasti kaise chuTegi magar haan aaj se firqa-parasti chhoD detaa huun khud apne haath se rasm-e-vidaai kar to di par ab koi baaraat aati hai to basti chhoD detaa huun tumhaare vasl kaa jis din koi imkaan hotaa hai main us din roza rakhtaa huun buraai chhoD detaa huun hukumat mil gai to un kaa kucha chhuT jaaegaa isi nuqte pe aa kar baadshaahi chhoD detaa huun mubaarak ho tujhe sad-aafrin ai shaan-e-mahrumi tire pahlu mein aa ke ghar-grihasti chhoD detaa huun"

"tujh se bichhDun to tiri zaat kaa hissa ho jaaun jis se martaa huun usi zahr se achchhaa ho jaaun tum mire saath ho ye sach to nahin hai lekin main agar jhuuT na bolun to akelaa ho jaaun main tiri qaid ko taslim to kartaa huun magar ye mire bas mein nahin hai ki parinda ho jaaun aadmi ban ke bhaTakne mein mazaa aataa hai main ne sochaa hi nahin thaa ki farishta ho jaaun vo to andar ki udaasi ne bachaayaa varna un ki marzi to yahi thi ki shagufta ho jaaun"

"tanhaai se bachaav ki surat nahin karun mar jaaun kyaa kisi se mohabbat nahin karun su-e-falak havaai safar hai to kyaa huaa Dar jaaun maahtaab ki surat nahin karun aankhein hain yaa sharaab ke saaghar bhare hue pi jaaun kyaa khayaal-e-shariat nahin karun qabze mein un ke shahr-e-tilismaat hi sahi kho jaaun kyaa khudaa ki ibaadat nahin karun jab tai huaa ki raushni parvardigaar hai pahlu bachaaun us ki itaaat nahin karun bazm-e-sukhan-taraaz mein naakaam hon to kyaa chillaaun apne fan ki hifaazat nahin karun vo aa gayaa 'kamaal' ki qimat ke aas-paas bik jaaun apne sach ki hifaazat nahin karun"

"raushni saans hi le le to Thahar jaataa huun ek jugnu bhi chamak jaae to Dar jaataa huun miri aadat mujhe paagal nahin hone deti log to ab bhi samajhte hain ki ghar jaataa huun main ne is shahr mein vo Thokarein khaai hain ki ab aankh bhi muund ke guzrun to guzar jaataa huun is liye bhi miraa eazaaz pe haq bantaa hai sar jhukaae hue jaataa huun jidhar jaataa huun is qadar aap ke badle hue tevar hain ki main apni hi chiiz uThaate hue Dar jaataa huun"

"vo ab tijaarati pahlu nikaal letaa hai main kuchh kahun to taraazu nikaal letaa hai vo phuul toDe hamein koi e'tiraaz nahin magar vo toD ke khushbu nikaal letaa hai main is liye bhi tire fan ki qadr kartaa huun tu jhuuT bol ke aansu nikaal letaa hai andhere chiir ke jugnu nikaalne kaa hunar bahut kaThin hai magar tu nikaal letaa hai vo bevafaai kaa izhaar yuun bhi kartaa hai parinde maar ke baazu nikaal letaa hai"

"shaam ke baad sitaaron ko sambhalne na diyaa raat ko rok liyaa chaand ko Dhalne na diyaa mauj-e-baatin kabhi auqaat se baahar na gai had ke andar bhi kisi shai ko machalne na diyaa aag to chaaron hi jaanib thi par achchhaa ye hai hosh-mandi se kisi chiiz ko jalne na diyaa ab ke mukhtaar ne muhtaaj ki divaar kaa qad jitnaa maamul hai utnaa bhi nikalne na diyaa jin buzurgon ki viraasat ke amiin hain ham log un ki qabron ne kabhi shahr badalne na diyaa"

"aakhiri maa'rka ab shahr-e-dhuaan-dhaar mein hai mere sirhaane kaa patthar isi divaar mein hai ab hamein pichhle havaala nahin denaa paDte ik yahi faaeda bigDe hue kirdaar mein hai beshtar log jise 'umr-e-ravaan kahte hain vo to ik shaam hai aur kucha-e-dildaar mein hai ye bhi mumkin hai ki lahja hi salaamat na rahe majlis-e-shahr bhi ab shahr ke baazaar mein hai dil kahaan apni riyaasat se alag jaataa hai vo to ab bhi usi ujDe hue darbaar mein hai"

"is andhe qaid-khaane mein kahin rauzan nahin hotaa bikhar jaate tabiat mein agar bachpan nahin hotaa tujhe kyaa ilm ke har choT pe taare nikalte hain vo aadam hi nahin jis kaa koi dushman nahin hotaa unhein bhi ham ne sayyaaron se vaapas aate dekhaa hai jahaan bas ishq hotaa hai koi indhan nahin hotaa hamaari naa-muraadi mein vafaadaari bhi shaamil hai agar kuchh aur hote to ye pairaahan nahin hotaa bahut mamnun huun phir bhi andhere kam nahin hote agar tum mere ghar hote to vo raushan nahin hotaa"

"tumhaari vaapsi hone kaa andaaza na ho jaae kahin bikhri hui miTTi tar-o-taaza na ho jaae farishton tum ne be aavaaz andeshe nahin dekhe yahi divaar aage baDh ke darvaaza na ho jaae baDi khvaahish hai phir se zindagi hamvaar karne ki magar us se kahin mismaar shiraaza na ho jaae abhi tak to natija bhi pas-e-divaar hai jaanaan tiri is mahviyat se kal kaa andaaza na ho jaae shabaahat pe adaakaari asar-andaaz hoti hai abhi tak to ye chehraa hai kahin ghaaza na ho jaae"

"zaraa zaraa si kai kashtiyaan banaa lenaa vo ab ke aae to bachpan rafu karaa lenaa tamaazaton mein mire gham ke saae mein chalnaa andheraa ho to miraa hausla jalaa lenaa shurua mein main bhi ise raushni samajhtaa thaa ye zindagi hai ise haath mat lagaa lenaa main koi fard nahin huun ki bojh ban jaaun ik ishtihaar huun divaar par lagaa lenaa rafaaqaton kaa tavaazun agar bigaD jaae khamoshiyon ke taaavun se ghar chalaa lenaa"

"phuul par os kaa qatra bhi ghalat lagtaa hai jaane kyuun aap ko achchhaa bhi ghalat lagtaa hai mujh ko maalum hai mahbub-parasti kaa azaab der se chaand nikalnaa bhi ghalat lagtaa hai aap ki harf-adaai kaa ye aalam hai ki ab peD par shahd kaa chhattaa bhi ghalat lagtaa hai ek hi tiir hai tarkash mein to ujlat na karo aise mauqe pe nishaanaa bhi ghalat lagtaa hai shaakh-e-gul kaaT ke tirshul banaa dete ho kyaa gulaabon kaa mahaknaa bhi ghalat lagtaa hai"

"amal bar-vaqt honaa chaahiye thaa zamin nam thi to bonaa chaahiye thaa samajhnaa thaa mujhe baarish kaa paani tumhein kapDe bhigonaa chaahiye thaa tu jaadu hai to koi shak nahin hai main paagal huun to honaa chaahiye thaa main mujrim huun to mujrim islie huun mujhe saalim khilaunaa chaahiye thaa agar kaT-phaT gayaa thaa meraa daaman tumhein siina pironaa chaahiye thaa"

"baraae-zeb us ko gauhar-o-akhtar nahin lagtaa vo khud ik chaand hai aur chaand ko zevar nahin lagtaa khudaayaa yuun bhi ho ki us ke haathon qatl ho jaaun vahi ik aisaa qaatil hai jo pesha-var nahin lagtaa agar aariz-parasti kaa amal ik jurm bantaa hai sazaa bhi kaaT leinge kaaTne se Dar nahin lagtaa mohabbat tiir hai aur tiir baatin chhed detaa hai magar niyyat ghalat ho to nishaane par nahin lagtaa rais-e-shahr ho kar bhi vo itnaa jhuk ke miltaa hai ki us ke saamne koi bhi qad-aavar nahin lagtaa"

"sar-ba-zaanu koi fankaar alag baiThaa hai main yahaan huun miraa kirdaar alag baiThaa hai shahr mein naama-e-taqdis likhaa jaaegaa mutmain huun miraa inkaar alag baiThaa hai teri taarif mein sab bol rahe hain lekin is pe hairat hai ki meaar alag baiThaa hai ghair-mahfuz hain divaar banaane vaale aur shahanshah sar-e-minaar alag baiThaa hai ab dabaaoge to patthar se nikal aaegi ek aavaaz kaa haqdaar alag baiThaa hai"

"tamaam bhiiD se aage nikal ke dekhte hain tamaash-bin vo chehra uchhal ke dekhte hain nazaakaton kaa ye aalam ki ru-numaai ki rasm gulaab baagh se baahar nikal ke dekhte hain tu laa-javaab hai sab ittifaaq rakhte hain magar ye shahr ke faanus jal ke dekhte hain ise main apne shabistaan mein chhu ke dekhtaa huun vo chaand jis ko samundar uchhal ke dekhte hain jo kho gayaa hai kahin zindagi ke mele mein kabhi kabhi use aansu nikal ke dekhte hain jo roz daaman-e-sad-chaak siite rahte hain tumhein vo iid pe kapDe badal ke dekhte hain"

"ye garm ret ye sahraa nibhaa ke chalnaa hai safar tavil hai paani bachaa ke chalnaa hai bas is khayaal se ghabraa ke chhaT gae sab log ye shart thi ki qataarein banaa ke chalnaa hai vo aae aur zamin raund kar chale bhi gae hamein bhi apnaa khasaara bhulaa ke chalnaa hai kuchh aise farz bhi zimme hain zimme-daaron par jinhein hamaare dilon ko dukhaa ke chalnaa hai shanaasaa zehnon pe taane asar nahin karte tu ajnabi hai tujhe zahr khaa ke chalnaa hai vo dida-var ho ki shaaer ki maskhara koi yahaan sabhi ko tamaasha dikhaa ke chalnaa hai vo apne husn ki khairaat dene vaale hain tamaam jism ko kaasa banaa ke chalnaa hai"

"ye lag rahaa hai rag-e-jaan pe laa ke chhoDi hai kisi ne aag bahut paas aa ke chhoDi hai gharon ke aaine surat ganvaa ke baiTh gae havaa ne dhuul bhi uupar uDaa ke chhoDi hai ye ab khulaa ki usi mein miri najaat bhi thi jo chiiz main ne bahut aazmaa ke chhoDi hai havaa kaa jabr kahin biich mein thamaa hi nahin tiri gali bhi bahut dil dukhaa ke chhoDi hai 'kamaal' dekhnaa ye khema-e-husain hai kyaa kisi ne dil mein koi shai jalaa ke chhoDi hai"

"kanvaare aansuon se raat ghaael hoti rahti hai sitaare jhaDte rahte hain rehearsal hoti rahti hai siyaasi mashq kar ke tum to dilli lauT jaate ho yahaan sahme hue logon mein halchal hoti rahti hai vahaan rakkhe hue mohre baraabar marte rahte hain idhar kheli hui baazi mukammal hoti rahti hai main sab kuchh bhuul ke jaane ki koshish kartaa rahtaa huun magar guzri hui vo raat paagal hoti rahti hai na jaane kyaa kharaabi aa gai hai mere lahje mein na jaane kyuun miri aavaaz bojhal hoti rahti hai"

"tum pe suraj ki kiran aae to shak kartaa huun chaand dahliz pe ruk jaae to shak kartaa huun main qasida tiraa likkhun to koi baat nahin par koi dusraa dohraae to shak kartaa huun uDte uDte kabhi maasum kabutar koi aap ki chhat pe utar jaae to shak kartaa huun phuul ke jhunD se haT kar koi pyaasaa bhanvraa tere pahlu se guzar jaae to shak kartaa huun ''shiv'' to ek taraashi hui murat hai magar tu unhein dekh ke sharmaae to shak kartaa huun"

"itnaa mohtaat ki jumbish nahin karne degaa umr-bhar ek guzaarish nahin karne degaa us se ummid ye karte ho ki suraj kaa tavaaf vo to mehvar pe bhi gardish nahin karne degaa dil hi chaahegaa to zanjir ke TukDe honge us se pahle koi koshish nahin karne degaa paar karne ke liye aaj bhi dariyaa kaa bahaao aisaa rakkhegaa ki khvaahish nahin karne degaa ab bhi siine mein kahaan baagh utarne vaalaa paanv de jaaegaa laghzish nahin karne degaa"