Ghazal

"asar na kam ho kabhi naala-e-rasaa teraa rahe baDhaa huaa har aan hausla teraa paDhi hai aariz-o-kaakul ki daastaan main ne sunaa hai main ne fasaana zaraa zaraa teraa ai ashk-e-shauq tujhi se hai zindagi dil ki fuzun hai chashma-e-haivaan se martaba teraa tamaam raah hai faiz-e-qadam se nuraani hai maahtaab zamin par ki naqsh-e-paa teraa qadam ko tez kar is se ziyaada ai 'betaab' nikal gayaa hai bahut duur qaafila teraa"

"khaTak ne dil ki diyaa zakhm-e-be-nishaan kaa pataa na us dahan mein fughaan thi na thaa zabaan kaa pataa sar-e-niyaaz jhukaane ki khu to paidaa kar jabin-e-shauq lagaa legi aastaan kaa pataa sitam dabaa na sakaa aap ke shahidon ko jafaa miTaa na saki khun-e-be-kasaan kaa pataa rag-e-burida pukaaregi naam qaatil kaa kafan bataaegaa us tegh-e-khun-chakaan kaa pataa isi qadar to hai sarmaaya-e-tajassus-e-aql ki kuchh zamin ki khabar hai kuchh aasmaan kaa pataa dil-e-tapaan thaa kahin chashm-e-khunfishaan thi kahin qadam qadam pe milaa kucha-e-butaan kaa pataa asir-e-daam-e-mohabbat se puchhiye 'betaab' kamand turra-e-mushkin-e-dilsitaan kaa pataa"

"gham se naa-ahl-e-vafaa hashr tak aazaad na ho mar ke sau baar ho zinda to kabhi shaad na ho is nasheman mein dharaa kyaa hai ki barbaad na ho chaar tinke hon paDe aur koi buniyaad na ho kyaa kahaa thaa tiri aankhon ne nazar milte vaqt phir nazar mujh se milaa le jo tujhe yaad na ho koi gaahak nahin murjhaae hue phulon kaa kisi siine mein ilaahi dil-e-naashaad na ho khush ho bulbul ki sazaa-vaar-e-asiri Thahri vaae us par hai ki jis kaa koi sayyaad na ho teri aankhon kaa jo maaraa nahin zinda hi nahin hai vahi ain ghalat jis pe tiraa saad na ho saamne aa gai hai manzil-e-paa laghz-e-firaaq madad ai ishq koi raah mein uftaad na ho jo ghubaar uThtaa hai kahtaa hai ba-aavaaz-e-buland sar na is khaak kaa unchaa ho jo barbaad na ho dil shikasta na ho TuTegaa qafas khud 'betaab' vaqt ki baat hai mumkin nahin aazaad na ho"

"dil liye aur dikhaa dikhaa ke liye ki jafaa aur maze jafaa ke liye rind ham hain to phir piyegaa kaun kyaa ye utri hai paarsaa ke liye aatish-e-hijr ai maaaz allaah ek dozakh hai mubtalaa ke liye jitne dil the buton ne chhin liye ek kaaba bachaa khudaa ke liye har hasin par na yuun miTo 'betaab' ek ke ho raho khudaa ke liye"

"zaraa soch kar ai jafaa karne vaale kahin ji na chhoDein vafaa karne vaale gila kuchh nahin mujh ko vaaiz se lekin ye kaun aap kaa tazkira karne vaale ghamanD un ko allaah re itnaa jafaa kaa to kyaa mar gae ab vafaa karne vaale baDe be-muravvat baDe bevafaa ho hamesha bahaana nayaa karne vaale gali mein tiri sar-ba-kaf ho ke aaein kahaan hain miraa saamnaa karne vaale vo bebaak chitvan yahi kah rahi hai kisi se nahin ham vafaa karne vaale shahidaan-e-ulfat na khush hon taDap kar vo is par nahin e'tinaa karne vaale ye kahtaa hai parvaane kaa jal ke marnaa vafaa karte hain yuun vafaa karne vaale samajhte hain aasaan abhi un kaa milnaa bahut duur hain hausla karne vaale naqaab un ki jis vaqt sarkegi rukh se qayaamat kareinge hayaa karne vaale dam-e-naza aakhir nikal aae aansu kahaan jaa ke chauke vafaa karne vaale zabaan par miri raaz-e-dil ab to aayaa miri sharm rakh le hayaa karne vaale davaa se to bimaar kuchh aur uljhaa maraz hi na samjhe davaa karne vaale khamoshi miri laash ki kah rahi hai jafaa sahte hain yuun vafaa karne vaale gadaa kaun betaab saa is gali mein hain yuun to bahut se sadaa karne vaale"

"Duub jaane ke sivaa ishq mein chaaraa hi nahin is samundar kaa kisi samt kinaaraa hi nahin talkhi-e-zakhm-e-jigar jis ko gavaaraa hi nahin us ko naavak nigah-e-naaz ne maaraa hi nahin sunte aate hain ki ik roz qayaamat hogi aap ne zulf-e-pareshaan ko sanvaaraa hi nahin parda-e-dil se sadaa yaar ki aa hi jaati ham tazabzub mein rahe us ko pukaaraa hi nahin baaz ham aise tasavvur se ki ab tak jis ne ek naqsha bhi tiraa Thiik utaaraa hi nahin phir shikaayat hai mire dil ke taDapne ki abas taak kar tiir koi aap ne maaraa hi nahin kyaa hai dariyaa-e-mohabbat ke udhar kyaa maalum teri talvaar ne us ghaaT utaaraa hi nahin un ki mahfil ki ajab baat hai kyaa arz karein tazkira sab kaa hai ik zikr hamaaraa hi nahin mil gai us ki nazar meri nazar se aakhir ab to denaa hi paDaa dil koi chaaraa hi nahin aur bhi dida-e-dil rakhte hain pur-khun ham se kuchh tire hijr mein ye rang hamaaraa hi nahin paarsaai mein hai fard us ki hayaa ai 'betaab' shauq-aalud nazar us ko gavaaraa hi nahin"

"na mere dil ne na idraak nukta-ju ne kiyaa khudaa gavaah hai jo kuchh kiyaa vo tu ne kiyaa farefta mujhe aalam ke rang-o-bu ne kiyaa baDaa sitam tire milne ki aarzu ne kiyaa lihaaz-e-daaman-e-qaatil mire lahu ne kiyaa khayaal-e-shart-e-adab khud rag-e-gulu ne kiyaa khud apni ziist kaa parda thaa jab alag ye huaa hijaab duur jamaal-e-rukh-e-niku ne kiyaa bahaar aai to kyaa naa-shagufta-khaatir ko fasurda aur bhi is mausam-e-numu ne kiyaa harim-e-quds mein pahunchaaegi shahaadat khud ki meri ruuh ko taahir mire lahu ne kiyaa tumhaari chaaragari ko salaam hai meraa ki ek zakhm ko sau zakhm ik rafu ne kiyaa vo kyunkar aa ke mile khud ye haal mujh se na puchh baraae-maqsad-e-dil tark aarzu ne kiyaa jo zaahidon ne na baatin ko dho ke saaf kiyaa to koi kaam na zaahir ki shust-o-shu ne kiyaa juz apne dil ke na paayaa kisi ne us kaa nishaan hazaar aql ko aavaara justuju ne kiyaa baDi umiid bandhi be-bason ko mahshar mein ajab karishma tire tarz-e-guftugu ne kiyaa kahungaa yaar se main saaf saaf hashr ke din ki mujh se hijr mein jo kuchh huaa vo tu ne kiyaa bajaa rahe na mire aql-o-hosh ai 'betaab' ghazab kaa mast mujhe pahle hi subu ne kiyaa"

"tujhe dekhe zaraa bhi jis ko shak ho us ki sanat mein nazar aataa hai qudrat kaa namuna teri surat mein fanaa ke baad bhi raushan rahegaa chehra-e-aashiq na farq aaegaa hargiz tere bimaaron ki surat mein natija khaak mein mil jaaegaa shab-zinda-daari kaa agar bhule se bhi jhapki palak shab-haa-e-furqat mein maza aataa hai dil ko bulbul-e-shaidaa ke naalon se havaale mere afsaanon ke hain us ki hikaayat mein zahe-bakht-e-rasaa un ke jo pahonche qurb mein tere baDe aaraam se hain saaya-e-daamaan-e-daulat mein nazar ko kaun qasr-e-yaar tak pahunchaae detaa hai lagaa di kis ne aisi durbin chashm-e-basirat mein banaataa hai ghubaar-e-dasht apni chashm kaa surma tire majnun ko ai lailaa nai sujhi hai vahshat mein mai-e-gul-gun ki vaaiz se mazammat sun ke hans denaa chalaa aataa hai ye dastur yaaraan-e-tariqat mein main ai 'betaab' khud majbur huun kuchh ban nahin paDtaa Tapak paDte hain aansu khud-bakhud aankhon se furqat mein"

"shaadmaani kaa kabhi gham kaa kabhi josh rahaa ek saudaa rahaa jab tak ki mujhe hosh rahaa juz tiri yaad ke sab dil se faraamosh rahaa marte marte divaane ko ye hosh rahaa rukh-e-pur-nur se bas un kaa ulaTnaa thaa naqaab kaun kambakht thaa aisaa ki jise hosh rahaa ye bhi ehsaan hai jo us ne na diyaa koi javaab shauq-e-ummid kaa haami lab-e-khaamosh rahaa be-dhaDak saamne mahshar ki vo aana teraa dekh lenaa jo kisi ek ko bhi hosh rahaa kis se fariyaad-e-sitam karte milaa jab ki na tu tu milaa jab to sitam teraa faraamosh rahaa raaz-e-sar-basta-e-mai-khaana na khulne paayaa aashnaa-e-lab-e-saaghar lab-e-mai-nosh rahaa dard rah rah ke mire dil mein uThaa kartaa hai teraa ehsaan ki tujhe main na faraamosh rahaa baar-e-ehsaan hai mire sar pe tiraa o qaatil sar judaa hone pe bhi main na subuk-dosh rahaa dard uThte hi taDapne lagaa naa-mahram-e-raaz jo adaa se tiri vaaqif thaa vo khaamosh rahaa kyaa kahun maut ne kis raaz ki di aa ke khabar baat hi kuchh thi vo aisi ki main khaamosh rahaa jaan 'betaab' ki aakhir shab-e-tanhaai ne li tu kahaan shaam se o vaa'da-faraamosh rahaa"

"jis ko paDi ho apne garebaan ke taar ki roe khizaan ko khair manaae bahaar ki mearaaj us ko kahiye hamaare ghubaar ki varna ye khaak aur havaa ku-e-yaar ki pazhmurda phuul huun chaman-e-rozgaar kaa tasvir huun do-rangi-e-lail-o-nahaar ki nichi nigaah aaD mein mizhgaan ki al-amaan sayyaad jaise ghaat mein baiThe shikaar ki chin-e-jabin-e-yaar ki chhuriyaan vahin chalin jon hi taDap baDhi nigah-e-intizaar ki munh faq hai is tarah miri subh-e-firaaq kaa jaise ho pahli shaam gharib-ud-dayaar ki 'betaab' khatm kar gae ustaad-e-naam-daar jaadu-nigaariyaan qalam-e-sehr-kaar ki"

"hijr mein gham-kash koi mujh saa nahin aaj tak main ne use dekhaa nahin kahne vaale ne to sab kuchh kah diyaa sunne vaalaa ek bhi samjhaa nahin maah main kis ko sunaaun haal-e-zaar khvaab mein bhi vo nazar aayaa nahin jab nazar ho manzil-e-maqsud par rok sakti raah ki iizaa nahin aarzu hi us ki dil mein rah gai haath daaman tak kabhi pahunchaa nahin bazm-e-saaqi mein hue vo sarfaraaz jaam jin ke haath mein chhalkaa nahin vaa'da-e-fardaa ki phir tafsil kar kyaa kahaa tu ne koi samjhaa nahin hai ghazab phir suur ne chaunkaa diyaa niind bhar kar main abhi soyaa nahin apnaa saa munh le ke shaana rah gayaa pech gesu kaa koi suljhaa nahin kasb har dam kuchh na kuchh karti hai ruuh jaisaa kal thaa aaj main vaisaa nahin jo nahin mast-e-sharaab-e-be-khudi us ne lutf-e-zindagi paayaa nahin jiite ji apne ko kar detaa thaa khaak maut se marnaa koi marnaa nahin yaad ai 'betaab' rakhnaa yaar ko paar hai beDaa agar bhulaa nahin"

"aql dauDaai bahut kuchh to gumaan tak pahunche kuchh haqiqat bhi hai insaan ki kahaan tak pahunche ishq ke shoale bhaDak kar rag-e-jaan tak pahunche aag si aag hai ye aag jahaan tak pahunche laD gai un se nazar khich gae abru un ke maarke ishq ke ab tir-o-kamaan tak pahunche dil se baahar ho tiraa raaz gavaaraa hai kise ye koi baat nahin hai ki zabaan tak pahunche maar le vo nigah-e-naaz to rutba ho buland sar ho unchaa miraa gar nok-e-sinaan tak pahunche koi divaangi-e-ishq kaa qissa chheDe silsila us kaa khudaa jaane kahaan tak pahunche surkhi-e-khaar-e-bayaabaan ye pata deti hai ki udhar se tire divaane yahaan tak pahunche rind pur-kaif ba-yak-gardish-e-chashm-e-saaqi ghaayat-e-daaera-e-kaun-o-makaan tak pahunche rukh se parde ko haTaa husn-e-yaqin tak pahunchaa aakhir insaan huun yuun aql kahaan tak pahunche raah mein aur bhi divaanon se milte julte puchhte puchhte ham un ke makaan tak pahunche sharbat-e-did na ho tegh kaa paani hi sahi koi ThanDak to mire qalb-e-tapaan tak pahunche le gae ishq ki baazi pa safaai 'betaab' jaan par khel gae jaan-e-jahaan tak pahunche"