The lyric art form of Urdu poetry — every sher a universe of longing, love, and philosophy
"main ne har-chand ki us kuche mein jaanaa chhoDaa par tasavvur mein mire us ne na aanaa chhoDaa us ne kahne se raqibon ke mujhe chhoD diyaa jis ki ulfat mein dilaa tu ne zamaanaa chhoDaa uTh gayaa parda-e-naamus mire ishq kaa aah us ne khiDki mein jo chilman kaa lagaanaa chhoDaa haath se mere vo piitaa nahin muddat se sharaab yaaro kyaa apni khushi main ne pilaanaa chhoDaa tere 'ghamgin' ko pareshaani hai us roz se yaar tu ne jis roz se zulfon kaa banaanaa chhoDaa"
"us shoala-ru se jab se miri aankh jaa lagi kyaa jaane tab se siine mein kyaa aag aa lagi kaabe mein vo zuhur hai jo but-kade mein hai ai shaikh munsifi se tu kahiyo khudaa-lagi paa tak bhi dastaras na ho mujh ko ye rashk hai aur tere haath mein rahe qaatil hinaa lagi dushnaam tum ne mujh ko jo di to main khush huaa aur main ne di duaa to tujhe bad-duaa lagi vo ghuncha-lab jo khanda-zanaan hai chaman mein aaj shaayad gulon ke khilne ki us ko havaa lagi khvaabida bakht ne vahin bedaar kar diyaa tere khayaal mein jo ye aankh ik zaraa lagi 'ghamgin' jo ek aan pe tere adaa huaa kyaa khush adaa use tiri ai khush-adaa lagi"
"us ke kuche mein gayaa main so phir aayaa na gayaa main vahaan aap ko DhunDaa to main paayaa na gayaa gum huaa dil mire pahlu se ki paayaa na gayaa shaayad us kuche mein jaa us se phir aayaa na gayaa dam-ba-khud ho ke muaa us ki nazaakat ke sabab aah-o-naala bhi mujhe us ko sunaayaa na gayaa us ne ik roz mein sau baar rulaayaa mujh ko mujh se par us but-e-khush-khu ko manaayaa na gayaa baad ik umar ke kyaa tujh se kahun ai 'ghamgin' haal-e-dil us ne jo puchhaa to sunaayaa na gayaa"
"mukhDaa vo but jidhar karegaa banda sajda udhar karegaa karnaa ho jise ki khaana viraan dil mein tire vo ghar karegaa vo lutf uThaaegaa safar kaa aap-apne mein jo safar karegaa vaaiz ye sukhan tiraa kabhi aah ham mein bhi kuchh asar karegaa ai shaikh tujhe buton se inkaar vallaah bahut zarar karegaa ho jis ko tamaam shab sar-e-shaam kyaa vasl mein vo sahar karegaa 'ghamgin' jo baiThe us ke dar par vo us ko na dar-ba-dar karegaa"
"jo na vahm-o-gumaan mein aave kis tarah tere dhyaan mein aave tujh se hamdam rakhun na poshida haal-e-dil gar bayaan mein aave meri ye aarzu hai vaqt-e-marg us ki aavaaz kaan mein aave main na dungaa javaab tu kah le jo ki teri zabaan mein aave ye shab-e-vasl khair se guzre to miri jaan jaan mein aave haae kyaa ho abhi jo ai hamdam vo sanam is makaan mein aave gar khule chashm-e-dil to tujh ko nazar vo hi saare jahaan mein aave us ki taarif kyaa karun 'ghamgin' hal-ataa jis ki shaan mein aave"
"us ki surat kaa tasavvur dil mein jab laate hain ham khud-ba-khud apne se hamdam aap ghabraate hain ham hosh gar rahtaa ho tujh ko ham se poshida na rakh jab vo yaan aataa hai ai dil tab kahaan jaate hain ham baiThe baiThe kyuun yakaayak haae dil khoyaa gayaa hamdam is kaa kuchh sabab DhunDe nahin paate hain ham khud-ba-khud kal shab ko vo bole uThaa munh se naqaab jo na dekhaa ho kisi ne mujh ko, dikhlaate hain ham be-sabab ho kar khafaa jab kuchh sunaataa hai vo shokh ji hi ji mein apne uupar haae jhunjhlaate hain ham shaam ko saaqi kabhi aataa hai gar teraa khayaal subh tak bhi hosh mein apne nahin aate hain ham ham ne gham kyaa khaak khaayaa gham ne ham ko khaa liyaa log ai hamdam samajhte hain ki gham khaate hain ham jaam le kar mujh se vo kahtaa hai apne munh ko pher ru-ba-ru yuun tere mai piine se sharmaate hain ham jo kalaam-e-ishq ye hargiz samajhtaa hi nahin dil ko sau sau tarah 'ghamgin' haae samjhaate hain ham"
"na puchh hijr mein jo haal ab hamaaraa hai umid-e-vasl hi par in dinon guzaaraa hai na dekhun tujh ko to aataa nahin kuchh aah nazar tu meri putli kaa aankhon ki yaar taaraa hai mujhe jo baam pe shab ko bulaae hai vo maah magar uruuj pe kyaa in dinon sitaaraa hai yaqin jaan tu vaaiz ki diin o duniyaa mein bas us ki sirf mujhe zaat kaa sahaaraa hai ajab tarah se nazar paD gayaa mire hamdam qayaamat aah vo mukhDaa bhi pyaaraa pyaaraa hai mujhe jo dosti hai us ko dushmani mujh se na ikhtiyaar hai us kaa na meraa chaaraa hai kahaa jo main ne pilaate ho bazm mein sab ko magar hamein hi nahin kyaa gunah hamaaraa hai to bole vo ki jise chaahein ham pilaaein sharaab khushi hamaari tiraa is mein kyaa ijaaraa hai gayaa vo parda-nashin jab se apne ghar 'ghamgin' tamaam khalq se dil ko mire kinaaraa hai"
"mujh se aazurda jo us gul-ru ko ab paate hain log aur hi rangat se kuchh kuchh aa ke farmaate hain log jab se jaanaa band meraa ho gayaa ai hamdamo tab se un ke ghar mein har har tarah ke aate hain log mere aah-e-sard ki taasir us ke dil mein dekh haae kis kis tarah mujh par us ko garmaate hain log jab vo ghabraate the mujh se tab the un ke ghar ke khush ab jo vo khush hain to un ke ghar ke ghabraate hain log koi samjhaao unhein bahr-e-khudaa ai momino us sanam ke ishq mein jo mujh ko samjhaate hain log roz-e-hijraan to dikhaayaa sau farebon se mujhe dekhiye ab aur kyaa kyaa haae dikhlaate hain log jo lagaate the bujhaate the hamesha un se aah vo hi ab naa-chaar 'ghamgin' mujh se sharmaate hain log"
"shama-ru aashiq ko apne yuun jalaanaa chaahiye kuchh hansaanaa chaahiye aur kuchh rulaanaa chaahiye zindagi kyunkar kaTe be-shaghl is piiri mein aah tum ko ab us naujavaan se dil lagaanaa chaahiye is main sab raaz-e-nihaan ho jaaeinge ham par ayaan phir use ik baar ghar apne bulaanaa chaahiye phir ye mumkin hai ki mere paas tu ik dam rahe kuchh na kuchh ai yaar bas tujh ko bahaanaa chaahiye go bahut hoshiyaar aashiq ai pari-ru hain tire lekin un mein ek 'ghamgin' saa divaana chaahiye"
"miraa us ke pas-e-divaar ghar hotaa to kyaa hotaa qazaa se ai falak gar is qadar hotaa to kyaa hotaa janaaze par mire us shokh ko laayaa hai tu aakhir agar ai ishq kuchh tujh mein asar hotaa to kyaa hotaa huaa behosh bilkul aah us ki aamad aamad mein gar aane se main us ke baa-khabar hotaa to kyaa hotaa isi aalam mein hain ye lutf ai dil ishq-baazi ke agar baagh-e-jinaan mein bul-bashar hotaa to kyaa hotaa tajalli to hui muusaa ko par meri tarah vaaiz hamesha jalva-gar har ik shajar hotaa to kyaa hotaa hunar-mandon ko tere haath se hai zindagi mushkil jo tujh mein bhi koi ai dil hunar hotaa to kyaa hotaa kiyaa badnaam ik aalam ne 'ghamgin' paak-baazi mein jo main teri tarah se bad-nazar hotaa to kyaa hotaa"
