Ghazal

"shajar-e-umid bhi jal gayaa vo vafaa ki shaakh bhi jal gai mire dil kaa naqsha badal gayaa miri subh raat mein Dhal gai vahi zindagi jo bahar-nafas jo bahar-qadam mire saath thi kabhi meraa saath bhi chhoD kar miri manzilein bhi badal gai na vo aarzu hai na justuju na koi tasavvur-e-rang-o-bu liye dil mein daagh-e-gham-e-khizaan main chaman se duur nikal gai tiri chaal puuri na ho saki tiraa vaar khaali chalaa gayaa zaraa dekh gardish-e-aasmaan ki main girte girte sanbhal gai tiri chaahaton se sanvar gae ye mire jamaal ke aaine main gulaab ban ke mahak uThi main shafaq ke rang mein Dhal gai ye tilism-e-mausam-e-gul nahin ki ye mo'jiza hai bahaar kaa vo kali jo shaakh se gir gai vo sabaa ki god mein pal gai vahi saaat-e-gham-e-aarzu jo hamesha dil mein basi rahi hai khudaa kaa shukr ki 'aafrin' vo hamaare sar se to Tal gai"

"na saath degaa koi raah aashnaa meraa judaa hai saare zamaane se raasta meraa guzar ke aai huun main gham ke regzaaron se nazar udaas hai dil hai dukhaa huaa meraa na jaane kis liye qaatil ke ashk bhar aae faraaz-e-daar pe jab saamnaa huaa meraa dayaar-e-jaan mein farozaan rahegi sham-e-hayaat samajh liyaa tiri aankhon ne muddaaa meraa kiyaa hai pesh tujhe aansuon kaa nazraana hujum-e-shaam-e-alam aur dil jalaa meraa vo saaneha mire dil par guzar gayaa 'gulnaar' har ek harf-e-duaa be-sadaa huaa meraa"

"aansu bhi vahi karb ke saae bhi vahi hain ham gardish-e-dauraan ke sataae bhi vahi hain kyaa baat hai kyuun shahr mein ab ji nahin lagtaa haalaanki yahaan apne paraae bhi vahi hain auraaq-e-dil-o-jaan pe jinhein tum ne likhaa hai naghmaat-e-alam ham ne sunaae bhi vahi hain ai josh-e-junun dard kaa aalam bhi vahi hai ai vahshat-e-jaan dard ke saae bhi vahi hain dekhaa hai jinhein aah-ba-lab chaak-garebaan har daagh-e-alam dil mein chhupaae bhi vahi hain sau rang bikhereinge mohabbat ke shagufe 'gulnaar' chaman mein hamein laae bhi vahi hain"

"ai shahr-e-sitam-pesha bataa kis ko sadaa duun ab kaun rahaa hai jise paighaam-e-vafaa duun shaamil miri saanson mein hai sadiyon ki aziyyat aa gardish-e-dauraan main tujhe bhi to duaa duun ashkon ke guhar bhi to nahin paas mire ab main soch rahi huun gham-e-dauraan tujhe kyaa duun Darti huun bikhar jaaegi khaakistar-e-jaan bhi bujhte hue shoalon main tumhein kaise havaa duun vo log jo sargarm-e-takallum hain sar-e-bazm kaise unhein aadaab takallum ke sikhaa duun ai raat saraabon ke sivaa kuchh na milegaa main din ke ujaale mein agar shama jalaa duun 'gulnaar' sar-e-shaakh-e-chaman laala-o-gul ko de de vo ijaazat to mahakne ki adaa duun"

"aankh mein ashk liye khaak liye daaman mein ek divaana nazar aataa hai kab se ban mein mere ghar ke bhi dar-o-baam kabhi jaageinge dhuup niklegi kabhi to mire bhi aangan mein kahiye aaina-e-sad-fasl-e-bahaaraan tujh ko kitne phulon ki mahak hai tire pairaahan mein shab-e-taarik miraa raasta kyaa rokegi mire aanchal mein sitaare hain sahar daaman mein kin shahidon ke lahu ke ye farozaan hain charaagh raushni si jo hai zindaan ke har ik rauzan mein ahd-e-rafta ki tamannaa kaa fusun zinda hai dil-e-naakaam abhi tak tiri har dhaDkan mein hamein manzur nahin agli ravaayaat-e-junun baa-khirad ho gai 'gulnaar' divaana-pan mein"

"vo charaagh-e-zist ban kar raah mein jaltaa rahaa haath mein vo haath le kar umr bhar chaltaa rahaa ek aansu yaad kaa Tapkaa to dariyaa ban gayaa zindagi bhar mujh mein ek tufaan saa paltaa rahaa jaanti huun ab use main paa nahin sakti magar har jagah saae ki surat saath kyuun chaltaa rahaa jo meri nazron se ojhal ho chukaa muddat hui vo khayaalon mein basaa aur sher mein Dhaltaa rahaa ranj thaa 'gulnaar' mujh ko us ko bhi afsos thaa der tak rotaa rahaa aur haath bhi maltaa rahaa"

"na puchh ai mire gham-khvaar kyaa tamannaa thi dil-e-hazin mein bhi aabaad ek duniyaa thi har ik nazar thi hamaare hi chaak-daamaan par har ek saaat-e-gham jaise ik tamaashaa thi hamein bhi ab dar o divaar ghar ke yaad aae jo ghar mein the to hamein aarzu-e-sahraa thi koi bachaataa hamein phir bhi Duub hi jaate hamaare vaaste zanjir mauj-e-dariyaa thi baghair samt ke chalnaa bhi kaam aa hi gayaa fasil-e-shahr ke baahar bhi ek duniyaa thi tilism-e-hosh-rubaa the vo manzar-e-hasti fazaa-e-dida-o-dil jaise khvaab aasaa thi koi rafiq-e-safar thaa na raahbar koi junun ki raah mein 'gulnaar' jaada-paimaa thi"

"gham gardish-e-dauraan ke bhulaae nahin jaate ab zakhm dil-o-jaan ke chhupaae nahin jaate kyaa ruuh ki gahraai mein tum jhaank rahe ho ab raaz mohabbat ke chhupaae nahin jaate jin raah-guzaaron pe tire naqsh-e-qadam hain vo naqsh-e-qadam ham se miTaae nahin jaate zulmat ke manaazir se rihaa ho gaiin nazrein zehnon se magar khauf ke saae nahin jaate main kaise tilaavat karun aayaat vafaa ki kyon taaj-mahal aaj banaae nahin jaate 'gulnaar' har ik sher se zaahir hai tiraa gham ashaar kabhi yunhi sunaae nahin jaate"

"yaad karne kaa tumhein koi iraada bhi na thaa aur tumhein dil se bhulaa dein ye gavaaraa bhi na thaa har taraf tapti hui dhuup thi ai umr-e-ravaan duur tak dasht-e-alam mein koi saayaa bhi na thaa mishal-e-jaan bhi jalaai na gai thi ham se aur palkon pe shab-e-gham koi taaraa bhi na thaa ham sar-e-raah-e-vafaa us ko sadaa kyaa dete jaane vaale ne palaT kar hamein dekhaa bhi na thaa ho gai khatm saraabon mein bhaTakti hui ziist dil mein hasrat hi rahi dasht mein dariyaa bhi na thaa kis khamoshi se jalaa daaman-e-dil ai 'gulnaar' koi shola bhi na thaa koi sharaaraa bhi na thaa"

"shaayad abhi kami si masihaaiyon mein hai jo dard hai vo ruuh ki gahraaiyon mein hai jis ko kabhi khayaal kaa paikar na mil sakaa vo aks mere zehn ki raanaaiyon mein hai kal tak to zindagi thi tamaashaa bani hui aur aaj zindagi bhi tamaashaaiyon mein hai hai kis liye ye vusat-e-daamaan-e-iltifaat dil kaa sukun to inhi tanhaaiyon mein hai ye dasht-e-aarzu hai yahaan ek ek dil tujh ko khabar bhi hai tire saudaaiyon mein hai tanhaa nahin hai ai shab-e-giryaan diye ki lau yaadon ki ek shaam bhi parchhaaiyon mein hai 'gulnaar' maslahat ki zabaan mein na baat kar vo zahr pi ke dekh jo sachchaaiyon mein hai"

"shaam-e-alam bhi guzri pahlu badal badal kar rotaa rahaa hai ye dil pahron machal machal kar manzil ki justuju mein pahunche kahaan kahaan ham dekhaa kiye tamaasha raste badal badal kar shahr-e-vafaa mein ham ne sab kuchh luTaa diyaa hai ye baat un se kahnaa logo sambhal sambhal kar kyaa zid kareinge tujh se ai gardish-e-zamaana hansnaa bhi aa gayaa hai gham se bahal bahal kar 'gulnaar' zabt-e-gham ki ye intihaa bhi dekhi daaman bhigo rahe hain aansu nikal nikal kar"

"hamaaraa naam pukaare hamaare ghar aae ye dil talaash mein jis ki hai vo nazar aae na jaane shahr-e-nigaaraan pe kyaa guzarti hai fazaa-e-dasht-e-alam koi to khabar aae nishaan bhuul gai huun main raah-e-manzil kaa khudaa kare ki mujhe yaad-e-rahguzar aae main aandhiyon mein bhi phulon ke rang paDh lungi tire badan ki mahak lauT kar agar aae ghubaar gham kaa dayaar-e-vafaa mein uDtaa hai magar ye ashk bahut kaam chashm-e-tar aae safar kaa rang hasin qurbaton kaa haamil ho bahaar ban ke koi ab to ham-safar aae nai sahar kaa main 'gulnaar' istiaara huun fazaa-e-tira-shabi khatm ho sahar aae"