Ghazal

"raakh ke Dher pe kyaa shoala-bayaani karte ek qisse ki bhalaa kitni kahaani karte husn itnaa thaa ki mumkin hi na thi khud-nigari ek imkaan ki kab tak nigaraani karte shola-e-jaan ko bujhaate yunhi qatra qatra khud ko ham aag banaate tujhe paani karte phuul saa tujh ko mahaktaa huaa rakhte shab bhar apne saanson se tujhe raat ki raani karte naddiyaan dekhein to bas sharm se paani ho jaaein chashm-e-khun-basta se paidaa vo ravaani karte sab se kahte ki ye qissa hai puraanaa saahab aah ki aanch se tasvir puraani karte dar-o-divaar badalne mein kahaan ki mushkil ghar jo hotaa to bhalaa naql-e-makaani karte koi aa jaataa kabhi yunhi agar dil ke qarib ham tiraa zikr pae-yaad-dahaani karte sach to ye hai ki tire hijr kaa ab ranj nahin kyaa dikhaave ke liye ashk-fishaani karte dil ko har lahza hi di aql pe ham ne tarjih yaar-e-jaani ko kahaan dushman-e-jaani karte shab isi tarah basar hoti hai meri 'irfaan' harf-e-khush-rang ko andoh-e-maaani karte"

"bahut khajil hain ki ham raaegaan bhi zinda rahe jahaan pe tu bhi nahin thaa vahaan bhi zinda rahe ajiib shart hai is be-yaqin mizaaj ki bhi ki tu bhi paas ho teraa gumaan bhi zinda rahe tujhe pe zid hai magar is tarah nahin hotaa ki tu bhi zinda rahe daastaan bhi zinda rahe vo kaun log the jin kaa vajud jism se thaa ye kaun hain jo pas-e-jism-o-jaan bhi zinda rahe jo ye na ho to sukhan kaa koi javaaz nahin zamir zinda rahe to zabaan bhi zinda rahe ye kaaenaat faqat manfaat kaa naam nahin koi yahaan pe baraae ziyaan bhi zinda rahe adam mein jo bhi nahin thaa vo sab vajud mein thaa ye ham hi the jo kahin darmiyaan bhi zinda rahe"

"ba-zom-e-aql ye kaisaa gunaah main ne kiyaa ik aainaa thaa usi ko siyaah main ne kiyaa ye shahr-e-kam-nazaraan ye dayaar-e-be-hunaraan kise ye apne hunar kaa gavaah main ne kiyaa harim-e-dil ko jalaane lagaa thaa ek khayaal so gul use bhi ba-yak sard aah main ne kiyaa vahi yaqin rahaa hai javaaz-e-ham-safari jo gaah us ne kiyaa aur gaah main ne kiyaa bas ek dil hi to hai vaaqif-e-rumuz-e-hayaat so shahr-e-jaan kaa use sarbaraah main ne kiyaa har ek ranj usi baab mein kiyaa hai raqam zaraa saa gham thaa jise be-panaah main ne kiyaa ye raah-e-ishq bahut sahl ho gai jab se hisaar-e-zaat ko paivand-e-raah main ne kiyaa ye umr ki hai basar kuchh ajab tavaazun se tiraa huaa na hi khud se nibaah main ne kiyaa khirad ne dil se kahaa tu junun-sifat hi sahi na puchh us ki ki jis ko tabaah main ne kiyaa"

"phir khuun mein vahshat raqsaan hai tajdid sitam karne ke liye ik taaza zakhm ki khvaahish hai ik sadma kam karne ke liye ham din-bhar duniyaa-daari mein hans hans ke baatein karte hain phir saari raat pighalte hain ik ashk raqam karne ke liye vo vasl ki jis ne ham donon ko yaksar be-buniyaad kiyaa ab fursat hai aa mil baiThein us vasl kaa gham karne ke liye ik kaari zakhm ki chaahat ne kyaa kyaa na hamein gulzaar kiyaa ham kis kis se mansub hue ik hijr baham karne ke liye insaan ke jiine marne ke majburi ke mukhtaari ke ye saare khel zaruri hain taamir adam karne ke liye"

"chaand bhi khoyaa khoyaa saa hai taare bhi khvaabida hain aaj fazaa ke bojhal-pan se lahje bhi sanjida hain jaane kin kin logon se is dard ke kyaa kyaa rishte the hijr ki is aabaad saraa mein sab chehre naadida hain itne barson baad bhi donon kaise TuuT ke milte hain tu hai kitnaa saada-dil aur ham kitne pechida hain sun jaanaan ham tark-e-taalluq aur kisi din kar leinge aaj tujhe bhi ujlat si hai ham bhi kuchh ranjida hain kaanon mein ik sargoshi hai be-maani si sargoshi aankhon mein kuchh khvaab saje hain khvaab bhi umr-rasida hain ghar ki vo makhdush imaarat gir ke phir taamir hui ab aangan mein peD hain jitne saare shaakh burida hain is basti mein ek saDak hai jis se ham ko nafrat hai us ke niche pagDanDi hai jis ke ham girvida hain"

"ek taarik khalaa us mein chamaktaa havaa main ye kahaan aa gayaa hasti se saraktaa huaa main shola-e-jaan se fanaa hotaa huun qatra qatra apni aankhon se lahu ban ke Tapaktaa huaa main aagahi ne mujhe bakhshi hai ye naar-e-khud-soz ik jahannam ki tarah khud mein bhaDaktaa huaa main muntazir huun ki koi aa ke mukammal kar de chaak par ghumtaa bal khaataa daraktaa huaa main majmaa ahl-e-haram naqsh-ba-divaar udhar aur idhar shor machaataa huaa baktaa huaa main mere hi dam se mili saaat-e-imkaan use vaqt ke jism mein dil ban ke dhaDaktaa huaa main be-niyaazi se miri aate hue tang ye log aur logon ki tavajjoh se bidaktaa huaa main raat ki raat nikal jaataa huun khud se baahar apne khvaabon ke taaaqub mein humaktaa huaa main aisi yakjaai ki miT jaae tamiz-e-man-o-tu mujh mein khiltaa huaa tu tujh mein mahaktaa huaa main ik to vo husn-e-junun-khez hai aalam mein shuhud aur ik husn-e-junun-khez ko taktaa huaa main ek aavaaz paDi thi ki koi saail-e-hijr? aan ki aan mein pahunchaa thaa lapaktaa huaa main hai kashid-e-sukhan-e-khaas vadiat mujh ko ghumtaa phirtaa huun ye itr chhiDaktaa huaa main raaz-e-haq faash huaa mujh pe bhi hote hote khud tak aa hi gayaa 'irfaan' bhaTaktaa huaa main"

"kahe detaa huun go hai to nahin ye baat kahne ki tiri khvaahish nahin dil mein ziyaada der rahne ki bachaa kar dil guzartaa jaa rahaa huun har ta’alluq se kahaan us aable ko taab hai ab choT sahne ki rag-o-pai mein na hangaama kare to kyaa kare aakhir ijaazat jab nahin is ranj ko aankhon se bahne ki bas apni apni tarjihaat apni apni khvaahish hai tujhe shohrat kamaane ki mujhe ik she'r kahne ki jahaan kaa huun vahin ki raas aaegi fazaa mujh ko ye duniyaa bhi bhalaa koi jagah hai mere rahne ki jo kal 'irfaan' par guzri sunaa kuchh us ke baare mein khabar tum ne suni tufaan mein dariyaa ke bahne ki"

"raftagaan ki sadaa nahin main huun ye tiraa vaahima nahin main huun tere maazi ke saath dafn kahin meraa ik vaaqi'a nahin main huun kyaa milaa intihaa-pasandi se kyaa main tere sivaa nahin main huun ek muddat mein jaa ke mujh pe khulaa chaand hasrat-zada nahin main huun us ne mujh ko muhaal jaan liyaa main ye kahtaa rahaa nahin main huun main hi 'ujlat mein aa gayaa thaa idhar ye zamaana nayaa nahin main huun meri vahshat se Dar gae shaayad yaar baad-e-fanaa nahin main huun main tire saath rah gayaa huun kahin vaqt Thahraa huaa nahin main huun gaahe gaahe sukhan zaruri hai saamne aaina nahin main huun sarsari kyuun guzartaa hai mujh se ye miraa maajraa nahin main huun us ne puchhaa kahaan gayaa vo shakhs kyaa bataataa ki thaa nahin main huun ye kise dekhtaa hai mujh se udhar tere aage khalaa nahin main huun"

"ab tire lams ko yaad karne kaa ik silsila aur divaana-pan rah gayaa tu kahin kho gayaa aur pahlu mein teri shabaahat liye ik badan rah gayaa vo saraapaa tiraa vo tire khaal-o-khad meri yaadon mein sab muntashir ho gae lafz ki justuju mein laraztaa huaa nim-vaa saa faqat ik dahan rah gayaa harf ke harf se kyaa tazaadaat hain tu ne bhi kuchh kahaa main ne bhi kuchh kahaa tere pahlu mein duniyaa simaTti gai mere hisse mein harf-e-sukhan rah gayaa tere jaane se mujh par ye uqda khulaa rang-o-khushbu to bas teri miraas the ek hasrat saji rah gai gul-ba-gul ek maatam chaman-dar-chaman rah gayaa ek be-naam khvaahish ki paadaash mein teri palkein bhi baaham piro di gaiin ek vahshat ko sairaab karte hue mein bhi aankhon mein le kar thakan rah gayaa arsa-e-khvaab se vaqt maujud ke raaste mein ganvaa di gai guftugu ek israar ki bebasi rah gai ek inkaar kaa baankpan rah gayaa tu sitaaron ko apni jilau mein liye jaa rahaa thaa tujhe kyaa khabar kyaa huaa ik tamannaa dariche mein baiThi rahi ek bistar kahin be-shikan rah gayaa"

"murattab aur bhi ik goshvaara ho rahaa hai to kyaa hai gar abhi ham ko khasaara ho rahaa hai hamaare paas to ham se ziyaada tu nahin thaa so tu kyaa ab to khud se bhi kinaara ho rahaa hai hamaare khvaab mein ahmiyat-e-shab thi ziyaada so ab vo khvaab aankhon mein sitaara ho rahaa hai tumhaari aarzu hone se pahle bhi to ham the guzaara ho rahaa thaa so guzaara ho rahaa hai hayaa-aalud aankhein hain na aanchal hai na chilman ye kis viraan duniyaa kaa nazaara ho rahaa hai abhi ham faisla karne ki ujlat mein nahin hain magar lagtaa hai jiine se khasaara ho rahaa hai khalaa se is zamin par sang-rezo ki ye baarish kisi jaanib se kyaa koi ishaara ho rahaa hai"

"dam-ba-khud meri anaa teri adaa bhi dam-ba-khud tere pahlu mein rahaa main aur rahaa bhi dam-ba-khud dekhiye pahle lahu Tapke ki phailein kirchiyaan dam-ba-khud teri nazar bhi aaina bhi dam-ba-khud itnaa sannaaTaa ki jaise avvalin shaam-e-firaaq dam-ba-khud hai aasmaan bhi aur havaa bhi dam-ba-khud yaad hai tujh ko vo pahle lams ki hiddat ki jab rah gai thi dafatan teri hayaa bhi dam-ba-khud ek se aalam mein donon mukhtalif asbaab se dam-ba-khud teraa karam meri duaa bhi dam-ba-khud aisaa lagtaa hai ki donon se nahin nisbat mujhe dam-ba-khud umr-e-ravaan sail-e-fanaa bhi dam-ba-khud khauf-e-tajdid-e-taaluq darmiyaan haail rahaa dam-ba-khud teraa sitam meraa galaa bhi dam-ba-khud yuun gumaan hotaa hai donon ki tavaqqoa ek thi dam-ba-khud teri vafaa meri sazaa bhi dam-ba-khud jab khule meri haqiqat tum vo manzar dekhnaa dam-ba-khud naa-aashnaa bhi aashnaa bhi dam-ba-khud"

"kis ajab saaat-e-naayaab mein aayaa huaa huun tujh se milne main tire khvaab mein aayaa huaa huun phir vahi main huun, vahi hijr kaa dariyaa-e-amiq koi dam aks-e-sar-e-aab mein aayaa huaa huun kaise aaine ke maanind chamaktaa huaa main ishq ke shahr-e-abad-taab mein aayaa huaa huun meri har taan hai az-roz-e-azal taa-ba-abad ek sur ke liye mizraab mein aayaa huaa huun koi parchhaain kabhi jism se karti hai kalaam? be-sabab saaya-e-mahtaab mein aayaa huaa huun har guzarte hue lamhe mein Tapaktaa huaa mein dard huun, vaqt ke aasaab mein aayaa huaa huun kaisi gahraai se niklaa huun adam ki 'irfaan' kaise paayaab se taalaab mein aayaa huaa huun"

"junun ke dam se aakhir martaba kaisaa milaa mujh ko abhi farhaad-o-qais aae the kahne marhabaa mujh ko kisi surat bhi rad hotaa nahin ye faisla dil kaa nazar aataa nahin koi bhi tujh saa dusraa mujh ko sar-e-kunj-e-tamannaa phir khushi se gungunaaungaa agar vo lauT kar aae to phir tum dekhnaa mujh ko na jaan-e-rashk se ghusse se gham se yaa raqaabat se ye kis andaaz se taktaa hai teraa aaina mujh ko khule to sab zamaanon ke khazaane haath aa jaaein dar-e-iqlim-e-haft-aalam hai vo band-e-qabaa mujh ko gumaan mein bhi gumaan lagti hai ab to zindagi meri nazar aataa hai ab vo khvaab mein bhi khvaab saa mujh ko kasaafat baar paa sakti nahin aisi lataafat mein karam us kaa ki bakhshaa dil ke badle aabla mujh ko sabaa meri qadam-bosi se pahle gul na dekhegi agar vahshat ne kuchh din baagh mein rahne diyaa mujh ko na nikli aaj gar koi yahaan yakjaai ki surat to kal se DhunDte phirnaa jahaan mein jaa-ba-jaa mujh ko guzargaah-e-nafas mein huun misaal-e-barg-e-aavaara koi dam mein uDaa le jaaegi baad-e-fanaa mujh ko vo dil-aavez aankhein vo lab-o-rukhsaar vo zulfein nahin ab dekhnaa kuchh bhi nahin us ke sivaa mujh ko azal se taa-abad duniyaa se le kar aasmaanon tak nazar aataa hai teri hi nazar kaa silsila mujh ko mire hone se hi kuchh e'tibaar us kaa bhi qaaem hai junun tum se nimaT legaa jo divaana kahaa mujh ko koi 'irfaan' mujh mein se mujhe aavaaz detaa hai are tu sochtaa kyaa hai kabhi kuchh to bataa mujh ko"

"aaj karnaa thi tavajjoh chaak-e-daamaan ki taraf dhyaan jaa niklaa magar ik ru-e-taabaan ki taraf jab havaa ke naam pahunchaa aamad-e-shab kaa payaam ek jhonkaa chal diyaa sham-e-farozaan ki taraf ek chehra jagmagaayaa hai sar-e-dasht-e-khayaal ek shoala uTh rahaa hai dil se mizhgaan ki taraf ye bayaabaan aur us mein chikhti gaati havaa un se dil bhar le to jaaun raah-e-aasaan ki taraf is tarah haail nahin hote kisi ki raah mein kyuun bhalaa itni tavajjoh ek mehmaan ki taraf ain mumkin hai ki tu sach bol kar zinda rahe main ishaara kar rahaa huun ek imkaan ki taraf ik taqaazaa bebasi ki raakh mein dahkaa huaa ik tazabzub kaa safar inkaar se haan ki taraf jis ke badle maut sadiyon ki basar karnaa paDe zindagi kaa qarz itnaa to nahin jaan ki taraf"

"zinda huun aur hijr kaa aazaar tak nahin vo kaam kar rahaa huun jo dushvaar tak nahin ab main huun aur tujh ko manaane ki justuju kuchh bhi nahin hai raah mein pindaar tak nahin yaani miraa vajud hi mashkuk ho gayaa ab to main apne-aap se bezaar tak nahin dil bhi thakan se chuur huaa aur dimaagh bhi aur aasmaan pe subh ke aasaar tak nahin iqraar kar ke us ko nibhaanaa kise nasib is umr mein to mohlat-e-inkaar tak nahin thi jis ki por por miri lams-aashnaa ab yaad us ke gesu-o-rukhsaar tak nahin is be-karaan khalaa mein nigaahon ko kyaa karun ab to nazar ke saamne divaar tak nahin"

"sukhan ke shauq mein tauhin harf ki nahin ki ki ham ne daad ki khvaahish mein shaaeri nahin ki jo khud-pasand the un se sukhan kiyaa kam kam jo kaj-kulaah the un se to baat bhi nahin ki kabhi bhi ham ne na ki koi baat maslahatan munaafiqat ki himaayat, nahin, kabhi nahin ki dikhaai detaa kahaan phir alag se apnaa vajud so ham ne zaat ki tafhim aakhiri nahin ki use bataayaa nahin hai ki main badan mein nahin jo baat sab se zaruri hai vo abhi nahin ki ba-naam-e-khush-nafasi ham to aah bharte rahe ki sirf ranj kiyaa ham ne, zindagi nahin ki hamesha dil ko mayassar rahi hai daulat-e-hijr junun ke rizq mein us ne kabhi kami nahin ki ba-sad khulus uThaataa rahaa sabhi ke ye naaz hamaare dil ne hamaari hi dilbari nahin ki jise vatira banaae rahi vo chashm-e-ghazaal vo be-rukhi ki suhulat hamein bhi thii, nahin ki hai ek umr se maamul roz kaa 'irfaan' duaa-e-radd-e-anaa ham ne aaj hi nahin ki"

"yaa mulaaqaat ke imkaan se baahar ho jaa yaa kisi din miri fursat ko mayassar ho jaa tujh ko maalum nahin hai miri khvaahish kyaa hai mujh pe ehsaan na kar aur subuk-sar ho jaa irtiqaa kyaa tiri qismat mein nahin likkhaa hai ab tamannaa se guzar meraa muqaddar ho jaa main jahaan paanv rakhun vaan se bagulaa uTThe reg-e-sahraa miri vahshat ke baraabar ho jaa ai mire harf-e-sukhan tu mujhe hairaan kar de to kisi din miri ummid se baDh kar ho jaa"

"chup hai aaghaaz mein, phir shor-e-ajal paDtaa hai aur kahin biich mein imkaan kaa pal paDtaa hai ek vahshat hai ki hoti hai achaanak taari ek gham hai ki yakaayak hi ubal paDtaa hai yaad kaa phuul mahakte hi navaah-e-shab mein koi khushbu se mulaaqaat ko chal paDtaa hai hujra-e-zaat mein sannaaTaa hi aisaa hai ki dil dhyaan mein gunjti aahaT pe uchhal paDtaa hai rok letaa hai abad vaqt ke us paar ki raah dusri samt se jaaun to azal paDtaa hai saaaton ki yahi takraar hai jaari har-dam meri duniyaa mein koi aaj, na kal paDtaa hai taab-e-yak-lahza kahaan husn-e-junun-khez ke pesh saans lene se tavajjoh mein khalal paDtaa hai mujh mein phaili hui taariki se ghabraa ke koi raushni dekh ke mujh mein se nikal paDtaa hai jab bhi lagtaa hai sukhan ki na koi lau hai na rau dafatan harf koi khuun mein machal paDtaa hai gham chhupaae nahin chhuptaa hai karun kyaa 'irfaan' naam luun us kaa to aavaaz mein bal paDtaa hai"

"ye kaise malbe ke niche dabaa diyaa gayaa huun mujhe badan se nikaalo main tang aa gayaa huun kise dimaagh hai be-faiz sohbaton kaa miyaan khabar uDaa do ki main shahr se chalaa gayaa huun maaal-e-ishq-e-anaa-gir hai ye mukhtasaran main vo darinda huun jo khud ko hi chabaa gayaa huun koi ghaDi hai ki hotaa huun aastin mein dafn main dil se bahtaa huaa aankh tak to aa gayaa huun miraa thaa markazi kirdaar is kahaani mein baDe saliqe se be-maajraa kiyaa gayaa huun vo mujh ko dekh rahaa hai ajab tahayyur se na-jaane jhonk mein kyaa kuchh use bataa gayaa huun mujhe bhulaa na sakegi ye rahguzaar-e-junun qadam jamaa na sakaa rang to jamaa gayaa huun sab ehtimaam se pahunche hain us ki bazm mein aaj main apne haal mein sarmast o mubtalaa gayaa huun mire kahe se mire gird-o-pesh kuchh bhi nahin so jo dikhaayaa gayaa hai vo dekhtaa gayaa huun use bataayaa nahin hijr mein jo haal huaa jo baat sab se zaruri thi vo chhupaa gayaa huun ghazal mein khinch ke rakh di hai apni jaan irfaan har ek sher mein dil kaa lahu bahaa gayaa huun"

"yahaan takraar-e-saaat ke sivaa kyaa rah gayaa hai musalsal ek haalat ke sivaa kyaa rah gayaa hai tumhein fursat ho duniyaa se to ham se aa ke milnaa hamaare paas fursat ke sivaa kyaa rah gayaa hai bahut mumkin hai kuchh din mein use ham tark kar dein tumhaaraa qurb aadat ke sivaa kyaa rah gayaa hai bahut naadim kiyaa thaa ham ne ik shirin-sukhan ko so ab khud par nadaamat ke sivaa kyaa rah gayaa hai hamaaraa ishq bhi ab maand hai jaise ki tum ho to ye saudaa riaayat ke sivaa kyaa rah gayaa hai kahaan le jaaein ai dil ham tiri vusat-pasandi ki ab duniyaa mein vusat ke sivaa kyaa rah gayaa hai salaamat hai koi khvaahish na koi yaad zinda bataa ai shaam vahshat ke sivaa kyaa rah gayaa hai kisi aahaT mein aahaT ke sivaa kuchh bhi nahin ab kisi surat mein surat ke sivaa kyaa rah gayaa hai bahut lambaa safar tai ho chukaa hai zehn o dil kaa tumhaaraa gham alaamat ke sivaa kyaa rah gayaa hai aziyyat thi magar lazzat bhi kuchh is se sivaa thi aziyyat hai aziyyat ke sivaa kyaa rah gayaa hai hamaare darmiyaan saari hi baatein ho chuki hain so ab in ki vazaahat ke sivaa kyaa rah gayaa hai bajaa kahte ho tum honi to ho kar hi rahegi to hone ko qayaamat ke sivaa kyaa rah gayaa hai shumaar o be-shumaari ke taraddud se guzar kar maaal-e-ishq-e-vahdat ke sivaa kyaa rah gayaa hai"

"khaana-e-dil ki tarah saari fazaa hai ki nahin kis ko maalum ki baahar bhi havaa hai ki nahin jashn barpaa to huaa thaa dam-e-rukhsat lekin vahi hangaama mire baad bapaa hai ki nahin puchhtaa hai ye har ik khaar-e-sar-e-dasht-e-junun aane vaalaa bhi koi aabla-paa hai ki nahin dekh to jaa ke masihaa-e-gham-e-ishq use haath ab tak yunhi siine pe dharaa hai ki nahin dil ke taarik dar-o-baam se aksar tiraa gham puchhtaa hai ki koi mere sivaa hai ki nahin main kahin huun ki nahin huun vo kabhi thaa ki na thaa tu hi kah de ye sukhan be-sar-o-paa hai ki nahin faisla lauT ke jaane kaa hai kitnaa mushkil kis se puchhun vo mujhe bhuul chukaa hai ki nahin main to vaaraftagi-e-shauq mein jaataa huun udhar nahin maalum vo aaghosh bhi vaa hai ki nahin jaane kyaa rang chaman kaa hai dam-e-subh-e-firaaq gul khile hain ki nahin baad-e-sabaa hai ki nahin ai shab-e-hijr zaraa der ko bahle to ye dil dekh 'irfaan' kahin naghma-saraa hai ki nahin"

"jo be-rukhi kaa rang bahut tez mujh mein hai ye yaadgaar-e-yaar-e-kam-aamez mujh mein hai sairaab kunj-e-zaat ko rakhti hai mustaqil bahti hui jo ranj ki kaarez mujh mein hai kaasa hai ek fikr se mujh mein bharaa huaa aur ik piyaala dard se lab-rez mujh mein hai ye karb-e-raaegaani-e-imkaan bhi hai magar teraa bhi ik khayaal-e-dil-aavez mujh mein hai taaza khile hue hain ye gulhaa-e-zakhm-e-rang har aan ek mausam-e-khun-rez mujh mein hai rakhti hai meri tab-e-ravaan baab-e-harf mein ye mustaqil jo dard ki mahmez mujh mein hai ab tak haraa-bharaa hai kisi yaad kaa shajar 'irfaan'! ek khitta-e-zarkhez mujh mein hai"

"nazar ko phir koi chehra dikhaayaa jaa rahaa hai ye tum khud ho ki mujh ko aazmaayaa jaa rahaa hai bahut aasudgi se roz-o-shab kaTne lage hain mujhe maalum hai mujh ko ganvaayaa jaa rahaa hai sar-e-mizhgaan bagule aa ke vaapas jaa rahe hain ajab tufaan siine se uThaayaa jaa rahaa hai miraa gham hai agar kuchh mukhtalif to is binaa par mire gham ko hansi mein kyuun uDaayaa jaa rahaa hai badan kis taur shaamil thaa mire kaar-e-junun mein mire dhoke mein us ko kyuun miTaayaa jaa rahaa hai vo divaar-e-anaa jis ne mujhe tanhaa kiyaa thaa usi divaar ko mujh mein giraayaa jaa rahaa hai miri khushiyon mein teri is khushi ko kyaa kahun main charaagh-e-aarzu tujh ko bujhaayaa jaa rahaa hai khirad ki saadgi dekho ki zaahir halaton se miri vahshat kaa andaaza lagaayaa jaa rahaa hai abhi ai baad-e-vahshat is taraf kaa rukh na karnaa yahaan mujh ko bikharne se bachaayaa jaa rahaa hai"

"tire jamaal se ham runumaa nahin hue hain chamak rahe hain magar aaina nahin hue hain dhaDak rahaa hai tu ik ism ki hai ye barakat vagarna vaaqiye is dil mein kyaa nahin hue hain bataa na paaein to khud tum samajh hi jaao ki ham bilaa javaaz to be-maajraa nahin hue hain tiraa kamaal ki aankhon mein kuchh zabaan pe kuchh hamein to moajize aise ataa nahin hue hain ye mat samajh ki koi tujh se munharif hi nahin abhi ham ahl-e-junun lab-kushaa nahin hue hain ba-naam-e-zauq-e-sukhan khud-numaai aap karein ham is maraz mein abhi mubtalaa nahin hue hain hami vo jin kaa safar maavaraa-e-vaqt-o-vajud hami vo khud se kabhi jo rihaa nahin hue hain khud-aagahi bhi khaDi maangti hai apnaa hisaab junun ke qarz bhi ab tak adaa nahin hue hain kisi ne dil jo dukhaayaa kabhi to ham 'irfaan' udaas ho gae lekin khafaa nahin hue hain"