Ghazal

"yaqin se bhi gae ehtimaal se bhi gae ham apne 'ahd mein khvaab-o-khayaal se bhi gae du'aa ke haath kaTe khvaahishon ke dil TuuTe javaab se bhi gae ham savaal se bhi gae tamaam log khudaa-tars hote jaate hain amir-e-shahr ‘uruj-o-zavaal se bhi gae kise yaqin dilaaein ki ham bhi zinda hain anaa ke zakhmi khudaa indimaal se bhi gae bahut hi mahngaa paDaa un ko shauq-e-ham-safari palaT ke aae to khud apni chaal se bhi gae junun hai zinat-e-tahzib-e-mahfil-e-yaaraan amin-e-hosh-o-khirad 'arz-e-haal se bhi gae hamaaraa zikr hai dimak-zada kitaabon mein ham ahl-e-'ilm-o-hunar the misaal se bhi gae badan ko toD rahi hai nai ruton ki thakan ye karb-e-hijr ke lamhe visaal se bhi gae palaT ke jaane ki himmat muhaajiron mein na thi vatan se bhi gae ahl-o-'ayaal se bhi gae hamaare dost saf-e-dushmanaan mein shaamil hain ham aise saada-mizaaj apni Dhaal se bhi gae"

"qatl hone khud hi qaatil ke makaan tak aa gae zindagi ki justuju mein ham kahaan tak aa gae main ne kuchh maangaa nahin tere sivaa allaah se ik du'aa ke badle saaton aasmaan tak aa gae ham zabaan rakhte hue bhi be-zabaan hain shahr mein kapkapaate lafz gungi daastaan tak aa gae muskuraati chaandni kaa jism niilaa ho gayaa dhuup ke zahrile paanv saaebaan tak aa gae kam se kam dastaar to rahne de sar par muflisi ghar ke saare raaz bachchon ki zabaan tak aa gae ab buzurgon ki nasihat yaad aati hai hamein phuul chunte chunte shahr-e-sakht-jaan tak aa gae muskuraati bhuuk aur aansu bhari aankhein liye lauT kar mazdur maghrib ki azaan tak aa gae mere haathon mein abhi tak dosti kaa lams hai doston ke haath mein tir-o-kamaan tak aa gae"

"phulon ko chhune se nashtar zakhmi hogaa ab ke sar mein lag kar patthar zakhmi hogaa kaafi din ke baad safar se lauTaa huun main jism thakan se chuur hai bistar zakhmi hogaa mausam ke chehre ki shiknein kahti hain aanhkein hongi yaa phir manzar zakhmi hogaa maujein dariyaa ke siine par kyaa likhti hain sochaa to main andar andar zakhmi hogaa barg-e-gul par suraj ke neze mat rakkho bholi-bhaali titli kaa par zakhmi hogaa aaankhon ki basti mein jab baazaar sajegaa kachche sapnon kaa saudaagar zakhmi hogaa main haathon mein khanjar le kar soch rahaa huun lauTungaa to meraa bhi ghar zakhmi hogaa"

"sahar hi aai na vo shaahid-e-sahar aayaa ghubaar-e-shab kaa musaafir hi mere ghar aayaa thakan ki dhuup Dhali bhi nahin thi sar se abhi azaab-e-hukm-e-safar mujh pe phir utar aayaa diyaa jalaate hue haath kaanpte kyuun hain kahaan se khauf badan mein havaa kaa dar aayaa ye lamha lamha bikharti hui anaa kaa vajud na ye zamin na vo aasmaan nazar aayaa ridaa rahi na badan par koi qabaa shaadaab ye kaun dhuup mein dekho barahna-sar aayaa badan tamaam huaa hai lahu-luhaan miraa nai ruton kaa musaafir ba-chashm-e-tar aayaa bahut aziiz hai apne vatan ki khaak hamein jo khvaab aankhon mein aayaa vo mo'tabar aayaa"

"lahraa rahe hain shaakhon pe parcham bahaar ke rakkhe hain titliyon ne abhi gham utaar ke khvaabon ke phuul palkon ki dahliz par na rakh murjhaa na jaaein dhuup mein mausam vaqaar ke har pal hain zindagi ke taqaaze nae nae lagne lage hain khud ko bhi ab ham udhaar ke basti mein aaj bhi miri chulhe nahin jale zinda hai phir bhi subh shab-e-gham guzaar ke gum ho gayaa hai ajnabi chehron mein apnaa-pan khaamosh ho gae mujhe mahram pukaar ke zakhmon ki khushk kyaariyaan shaadaab ho gaiin kitne karam hain mujh pe mire gham-gusaar ke bechaini be-qaraari hamein raas aa gai lamhe the zindagi mein bahut kam qaraar ke"

"phuul se lahje mein talvaar kahaan se aai tujh mein ye jurat-e-inkaar kahaan se aai main to samjhaa thaa ki thak jaaungaa chalte chalte mere qadmon mein ye raftaar kahaan se aai ye to sab maan ki du'aaon kaa asar hai varna gardish-e-vaqt taraf-daar kahaan se aai kholiyaan zakhmi parindon ki tarah se taDpein TuTti raat mein ye car kahaan se aai main to pardes mein rahtaa huun mire bhaai bataa mere aangan mein ye divaar kahaan aai gir gai hai to ye ehsaas hai nange sar huun sochtaa huun ki ye dastaar kahaan se aai bint-e-iflaas ne Thukraa diyaa shahzaada-e-zar is qabile mein ye khuddaar kahaan se aai"

"yuun tabi'at to paDhaai mein lagaa rakkhi thi is ki tasvir kitaabon mein sajaa rakkhi thi khud-kushi karne se pahle kisi doshiza ne phuul se haathon mein khushbu-e-hinaa rakkhi thi vo dupaTTe jo kabhi sar se Dhalakte hi na the raat un mein bhi bahut tez havaa rakkhi thi beTi sasuraal mein do din bhi khushi se na rahi shart daulat ne gharibi se lagaa rakkhi thi phuul se hanste hue bachchon ki khaatir maan ne apne aanchal mein kaDi dhuup chhupaa rakkhi thi 'aam laDkon ki tarah ham ne bhi taa'lim ke baa'd naukri milne ki ummid lagaa rakkhi thi mere honTon ko kabhi izn-e-takallum na milaa varna main ne bhi tire haq mein du'aa rakkhi thi"

"aap se mil kar meri tabi'at phulon jaisi rahti hai vaqt mile to kal phir aanaa kal bhi meri chhuTTi hai jaane kaunsaa mausam hai ye chaaron taraf hariyaali hai tote se mainaa kahti hai imli kitni miThi hai jab purvaai so jaati hai bojhal bojhal paanv liye an-chhue patton ke pichhe ik siiTi si bajti hai kachchi chhaton ke niche saae simTe simTe rahte hain tanhaai ke lamhon mein baarish bhi achchhi lagti hai dusraa bistar ab agli tankhvaah pe hi ban paaegaa shaam Dhale tum ghar aa jaanaa aaj to behad sardi hai vo kyaa jaane hotel-voTal picture-vikchar taash club gaanv ki laDki shahr mein aa kar sahmi sahmi rahti hai mausam ki pahli baarish mein suraj palkein mundegaa saat samundar paar na jaanaa aag ki nadiyaa bahti hai"

"aankhon mein kachchi niind ke sapne bikhar gae shaakhon pe phuul khilne se pahle bikhar gae palkein bichhaae raah mein baiThe the haadse achchhaa huaa safar ke iraade bikhar gae ham ne bahut sanbhaal ke rakkhe the raat-din aangan mein maslahat ke taqaaze bikhar gae aisi havaa chali ki du'aaein laraz gaiin pal mein kitaab-e-zist ke safhe bikhar gae kab tak 'aziz rakhte mire bhaai bhi mujhe be-rozgaari mein sabhi rishte bikhar gae kab tak uThaate bojh buzurgon ke qarz kaa suraj ko chhu ke phuul se bachche bikhar gae"

"aankhon aankhon mein ishaaraat alif se ye tak sahme sahme se hain jazbaat alif se ye tak shab ke siine mein larazti hain karaahein pal pal din ke honTon pe hain naghmaat alif se ye tak jism se chipke hue reshmi kapDe us ke yaad aati hai vo barsaat alif se ye tak aahaTein dhaDkanein bechainiyaan aankhein nindein kaise guzri hai miri raat alif se ye tak aaj suraj ke darichon se nikal aaegaa chaand hai 'ajab husn-e-mulaaqaat alif se ye tak naam taa'lim pata 'umr mashaaghil pesha kaise kaise the savaalaat alif se ye tak ajnabi lafz thakaa lahja shikasta mafhum kaun samjhegaa miri baat alif se ye tak"

"mohabbat par to mahngaai bahut hai ye nafrat hi mire bhaai bahut hai mire haathon hi meraa qatl hogaa miri baaton mein sachchaai bahut hai vo mere saamne baiThaa huaa hai magar aankhon mein tanhaai bahut hai khudaa kaa naam le aur paar ho jaa samundar mein to gahraai bahut hai musaafir khairiyat se lauT aaein tabi'at aaj ghabraai bahut hai hare zakhmon kaa mustaqbil hi kyaa hai bas ik halki si purvaai bahut hai puraane khat angiThi mein jalaa ke vo laDki aaj pachhtaai bahut hai"

"khushk hone lagi jab bhige dinon ki khushbu yaad aane lagi phir us ke labon ki khushbu chhuTTiyon mein bhi mahakti thi paDhaai us ki us ne rakkhi thi kitaabon mein khaton ki khushbu muskuraati hui chehron pe nashili aankhein raasta roke hue kachche phalon ki khushbu shahr mein phail gai gaanv ke panghaT ki tarah sar pe rakkhe hue miTTi ke ghaDon ki khushbu badliyaan khushk hui jaati hain jhilon ki tarah pyaas bhaDkaane lagi kachchi chhaton ki khushbu"

"qadmon mein dastaar paDi hai ghar mein maan bimaar paDi hai ye koshish bhi sharminda hai patthar par talvaar paDi hai apni ye saughaat bhi le jaa tanhaai be-kaar paDi hai khuun bhi apnaa honT bhi apne aangan mein divaar paDi hai"

"kitnaa afsurda hai khayaal us kaa vo nahin hai to hai malaal us kaa aks-dar-aks saaya-e-larzaan aaina aaina jamaal us kaa kitnaa mushkil huaa javaab mujhe kitnaa aasaan thaa savaal us kaa lauT aataa hai zakhmi khvaab liye khush-yaqini mein ehtimaal us kaa der tak guftugu udaas rahi khaamushi mein bhi thaa khayaal us kaa"

"raaste khauf-zada karte rahe ham-safar mein the duaa karte rahe muskuraane ki sazaa milti rahi muskuraane ki khataa karte rahe umr bhar qarz adaa ho na sakaa umr bhar qarz adaa karte rahe khvaab aankhon se judaa ho na sake khvaab aankhon se judaa karte rahe aap ne jo bhi kahaa ham ne sunaa aap ne jo bhi kahaa karte rahe vaqt bhi ham se gilaa kartaa rahaa vaqt se ham bhi gilaa karte rahe aur vo paas-e-vafaa kar na sake aur ham paas-e-vafaa karte rahe"

"jaagti aankhon ko khvaabon ki sazaa de jaaegaa phir puraanaa dost koi dukh nayaa de jaaegaa jaane kab TuTegaa ye lafz o ma'aani kaa tilism jaane kab vo gunge lafzon ko sadaa de jaaegaa buDhi aankhon ne sajaayaa hai javaan beTe kaa khvaab kaanpte haathon mein ik khat Daakiyaa de jaaegaa raat din lipTaa hai pairon se mire andhaa safar ajnabi ehsaas manzil kaa pataa de jaaegaa muskuraati zindagi ke khuun kaa pyaasaa uqaab vaqt ke haathon mein zakhmi faakhta de jaaegaa jhuuT is se pahle to bachchon ke honTon par na thaa bhuuk kaa aaseb un ko aur kyaa de jaaegaa raat ke aangan mein suraj ke musaafir kaa qayaam phuul se jismon ko zakhmon ki qabaa de jaaegaa mere munsif faisla teraa sar-e-taslim kham jo bhi kuchh hogaa muqaddar kaa likhaa de jaaegaa phir dulhan banne se pahle muflisi beva hui phir amir-e-shahr khvaabon ko chitaa de jaaegaa"

"bujhti hui aankhon ki umidon kaa diyaa huun main tez havaaon ki hatheli pe rakhaa huun main apni hi aavaaz ki pahchaan mein gum huun tanhaai ke sahraa mein darakhton ki sadaa huun main roz nikal paDtaa huun anjaane safar par manzil ke qarib aa ke bhi manzil se judaa huun har subh nae karb ke chehron se mulaaqaat har shaam bichhaDne kaa sabab puchh rahaa huun ye khuun mein Duube hue maa'sum farishte khaamosh larazte hue honTon ki du'aa huun is darja huun sahmaa huaa suraj ki tapish se girti hui divaar ke saae mein khaDaa huun ai khaak-e-vatan ab to vafaaon kaa silaa de main TuTti saanson ki fasilon pe khaDaa huun palkon pe sajaae hue sachchaai ki shamein naa-karda gunaahon ki sazaa kaaT rahaa huun dastaar salaamat na ridaaein na qabaaein har lamha sulagte hue khvaabon ki chitaa huun"

"teraa dukh aur aanhkein bharne vaalaa main teri khaatir sab kuchh karne vaalaa main khushbu ban kar jis mein palne vaalaa tu ek zaraa purvaai, bikharne vaalaa main teDhi-meDhi raah banaane vaalaa tu kabhi na thakne roz guzarne vaalaa main tanhaai mein chhoD ke jaane vaalaa tu tanhaai se kabhi na Darne vaalaa mein saat samundar paar bulaane vaalaa tu saat samundar paar utarne vaalaa main lamha lamha roz sanvarne vaalaa tu lamha lamha lamha roz bikharne vaalaa main meri shikaayat roz karaane vaalaa tu teri shikaayat roz mukarne vaalaa main"

"jaagti aankhon ko khvaabon ki sazaa de jaaegaa phir puraanaa dost koi dukh nayaa de jaaegaa jaane kab TuTegaa ye lafz-o-ma'aani kaa tilism jaane kab vo gunge lafzon ko sadaa de jaaegaa buDhi aankhon ne sajaayaa hai javaan beTe kaa khvaab kaanpte haathon mein ik khat Daakiyaa de jaaegaa raat din lipTaa hai pairon se mire andhaa safar ajnabi ehsaas manzil kaa pata de jaaegaa raat ke aangan mein suraj ke musaafir kaa qiyaam phuul se jismon ko zakhmon ki qabaa de jaaegaa muskuraati zindagi ke khuun kaa pyaasaa 'uqaab vaqt ke haathon mein zakhmi faakhta de jaaegaa jhuuT is se pahle to bachchon ke honTon par na thaa bhuuk kaa aaseb un ko aur kyaa de jaaegaa mere munsif faisla teraa sar-e-taslim kham jo bhi kuchh hogaa muqaddar mein likhaa de jaaegaa phir dulhan banne se pahle muflisi beva hui phir amir-e-shahr khvaabon ko chitaa de jaaegaa"

"nae chehre puraane ho na jaaein in aankhon ke khazaane kho na jaaein sajaa to li hai tum ne muskuraahaT kahin ye honT zakhmi ho na jaaein safar mein tum hamaare saath rahnaa kahin ham raaston mein kho na jaaein tumhaari muntazir vo buDhi aankhein lipaT kar aahaTon se so na jaaein hamaari khub-surat kyaariyon mein ruton ke haath kaanTe bo na jaaein"