Ghazal

"maanaa ki musaafir hain jahaan-e-guzaraan ham maa'lum to ho ham ko ki aakhir hain kahaan ham kyaa koi jahannam thaa pas-e-parda-e-afkaar ik lams-e-gurezaan se hue sho'la-ba-jaan ham duniyaa ho koi khvaab ki afsaana ho lekin ye ham ko yaqin hai ki nahin vahm-o-gumaan ham is vaz' se jiinaa koi aasaan nahin thaa guzre na kisi taur kisi par bhi giraan ham ai raushni-e-fikr-o-nazar teri badaulat suraj na sahi phir bhi hain 'aalam pe 'ayaan ham duniyaa ko bhi dekheinge jo fursat hui ham ko filhaal to hain apni hi jaanib nigaraan ham ye dard ki ne'mat jo mayassar hai na hoti rahte jo jahaan mein sifat-e-ahl-e-jahaan ham ai 'ishq jo hogaa tiri 'azmat ke munaafi apnaaeinge bhule se na vo tarz-e-bayaan ham likhte hain vahi she'r nikaltaa hai jo dil se dohraate nahin 'lais' hadis-e-digaraan ham"

"zindagi yuun hai ki maail-ba-fanaa ho jaise koi miTtaa huaa naqsh-e-kaf-e-paa ho jaise kitni be-jaan hai is fasl ke phulon ki hansi jaankani mein koi mafhum adaa ho jaise mai ye di hai ki mire nafs ko rishvat saaqi dil dukhaanaa tire mashrab mein ravaa ho jaise barg-e-gul qatra-e-shabnam se jhukaa jaataa hai baar-e-ehsaan baDi mushkil se uThaa ho jaise yuun baDhe jaate hain tufaan ki jaanib kuchh log un ki kashti ke muaafiq hi havaa ho jaise be-dili apnaa muqaddar hai hamesha se magar aaj to shisha-e-dil TuuT gayaa ho jaise kis ke qadmon ki ye aahaT si hai zindaan ke qarib vaqt ke dil ke dhaDakne ki sadaa ho jaise gum hai hangaama-e-haalaat mein yuun ruh-e-nashaat dam-ba-khud kunj-e-gulistaan mein sabaa ho jaise aaj yuun zehn mein raushan hue maazi ke nuqush koi ujDaa huaa ghar phir se basaa ho jaise mujh ko izhaar-e-sadaaqat ki bhi milti hai sazaa main ne ai 'lais' koi jurm kiyaa ho jaise"

"tum ne bhule se kabhi ye nahin sochaa hogaa ham jo bichhDeinge to kyaa haal hamaaraa hogaa aa gae ho to ujaalaa hai miri duniyaa mein jaaoge tum to andheraa hi andheraa hogaa ye na kahiye ki miri aankh se Tapkaa aansu chhoDiye bhi koi TuuTaa huaa taaraa hogaa kyaa khabar thi ki tire shahr se pahle ai dost raat aa jaaegi aur raah mein dariyaa hogaa khvaab lab khvaab jabin khvaab adaa khvaab hayaa itne khvaabon mein koi khvaab to sachchaa hogaa dil ke aaine mein kar aks-e-tamannaa na talaash tu muqaabil hai to hairat ke sivaa kyaa hogaa paikar-e-ishq to farhaad bhi thaa majnun bhi aur vo shakhs ki tu ne jise chaahaa hogaa aaj to khush huun bahut khush huun bahut hi khush huun is tasavvur mein main kaanp uThtaa huun kal kyaa hogaa ek vo hain jinhein khalvat mein bhi lutf-e-jalvat haae vo shakhs jo mahfil mein bhi tanhaa hogaa fikr anjaam-e-mohabbat ki hai tauhin ai 'lais' vahi hogaa miri qismat mein jo likkhaa hogaa"

"nahin ye baat ki parvaaz kaa iraada nahin fazaa-e-gulshan-e-hasti magar kushaada nahin mizaaj-e-ishq to apnaa hai e'tidaal-pasand yahi ravish hai kabhi kam nahin ziyaada nahin khizaan mein bhi miraa nashsha utar nahin saktaa ki ye hai josh-e-junun koi josh-e-baada nahin shuur-o-fikr mein aazaad hai mizaaj miraa mire badan pe kisi aur kaa labaada nahin nigaah chaahiye tahrir ho khafi ki jali kitaab-e-zist kaa koi varaq bhi saada nahin rah-e-hayaat mein daanista misl-e-shama jale hamaari zaat kaa isaar be-iraada nahin na zaad-e-raah ki khvaahish na raahbar ki talab hamaare vaaste dushvaar koi jaada nahin paDaa jo vaqt to ghairon ne meraa saath diyaa mire sharik mire ahl-e-khaanvaada nahin bisaat-e-dahr pe kyaa chaal kaamyaab chale tiri nazar mein agar azmat-e-piyaada nahin jahaan mein milne ko milte hain yuun to sab se 'lais' magar kisi se bhi maqsud istifaada nahin"

"jo ittifaaq se ham saahab-e-faraash hue to ham pe raaz-e-azizaan bhi khuub faash hue ham aaina to nahin phir bhi raat bistar par gire jo aa ke to girte hi paash-paash hue kise sunaaiye aazaadgaan-e-shahr kaa haal ki rafta-rafta sabhi kushta-e-maaash hue na puchh ashk-e-riyaa-kaar kaa maaal ai dost vo ashk to rukh-e-ehsaas ki kharaash hue tamaam umr talaash-e-sukun rahi ham ko tamaam umr na aasuda-e-talaash hue kahaan ki naghma-saraai ki saaz-e-hasti ke tamaam taar hi mahrum-e-irtiaash hue janaab-e-'lais' jo ahbaab se gurezaan the ye inqalaab to dekho ki yaar-baash hue"

"kisi gumaan kisi imkaan kaa rukh nahin karti nigaah jalva-e-arzaan kaa rukh nahin karti basi hui hai jo aabaadiyon mein barbaadi junun ki mauj bayaabaan kaa rukh nahin karti sabaa ko fasl-e-bahaaraan se kyaa milaa aakhir vo gul khile ki gulistaan kaa rukh nahin karti hisaar-e-vaqt mein apnaa vujud hai mahbus asiri ab rah-e-zindaan kaa rukh nahin karti mire 'azizon mein rusvaa miri rifaaqat hai jabhi ye halqa-e-yaaraan kaa rukh nahin karti fazaa to nur-e-sadaaqat se jagmagaati hai ye raushni dil-e-insaan kaa rukh nahin karti vo kuchh nahin koi farsuda si rivaayat hai vo fikr jo nae 'unvaan kaa rukh nahin karti havaa bhi kitni zamaana-shanaas hai ai 'lais' har ek sehn-e-gulistaan kaa rukh nahin karti"

"kahin se bhi sukhan-e-mo'atabar nahin aataa nazar hamein koi ahl-e-nazar nahin aataa havaa-e-dasht ye taasir-e-khud-faraamoshi bahut dinon se tasavvur mein ghar nahin aataa ajab shanaavar-e-bahr-e-vajud hain ham bhi hamein zamaan-o-makaan kaa safar nahin aataa lahu se lafz ki takhliq ham nahin karte jabhi to apne bayaan mein asar nahin aataa ye sochte hain ki manzil-rasi se kyaa haasil jab apne saath koi ham-safar nahin aataa ye arsa-gaah-e-talab qurbaton ki duniyaa hai yahaan ham aisaa koi be-hunar nahin aataa dariche roz hi khulte hain band hote hain magar vo chehra-e-rangin nazar nahin aataa hijaab kaun saa maane hai kuchh nahin maalum main chaahtaa huun vo aae magar nahin aataa tilism-e-tira-shabi 'lais' kis tarah TuuTe koi bhi le ke payaam-e-sahr nahin aataa"

"itni mushkil mein bhi ahbaab na Daalein mujh ko ki sambhalnaa bhi na chaahun to sambhaalein mujh ko gham-e-dauraan gham-e-jaanaan gham-e-jaan ek hue Dar rahaa huun ye kahin maar na Daalein mujh ko munfarid meri tabiat hai ye haalaat kahin ravish-e-aam ke saanche mein na Dhaalein mujh ko main to is par bhi huun raazi ki tire shahr ke log mere bante nahin apnaa hi banaa lein mujh ko aap mujh se kisi taabir ki phir baat karein pahle is khvaab-e-tamannaa se jagaa lein mujh ko nahin maalum ki kal tak main rahun yaa na rahun mehrbaan aaj hi ji-bhar ke sataa lein mujh ko gardishon ke liye ab tak na ye mumkin na huaa kisi surat mire mehvar se haTaa lein mujh ko in bulandi ke makinon ko mayassar hi nahin 'lais' vo haath jo pasti se uThaa lein mujh ko"

"muskuraa saktaa nahin aansu bahaa saktaa nahin zindagi ab main tire ehsaan uThaa saktaa nahin jo shikast-e-aarzu par muskuraa saktaa nahin zindagi ki azmaton kaa raaz paa saktaa nahin taalibaan-e-rang-o-bu kaanTon se daaman-kash na hon shaakh-e-gul tak yuun kisi kaa haath jaa saktaa nahin tujh se mil kar jaane kyuun hotaa hai ye mujh ko gumaan tujh ko kho saktaa huun lekin tujh ko paa saktaa nahin mutmain huun main ki zinda hai miri tab-e-ghayur meri khuddaari pe koi harf aa saktaa nahin sham-e-giryaan ko bhalaa kyaa azmat-e-gham ki khabar koi parvaana kabhi aansu bahaa saktaa nahin tujh se milne ki tamannaa hai ki tujh se rah ke duur e'tibaar-e-hasti-e-mauhum aa saktaa nahin 'lais' main rakhtaa huun pahlu mein dil-e-dard-aashnaa bhuul kar bhi main kisi kaa dil dukhaa saktaa nahin"

"'umr-bhar khvaab-e-mohabbat se na bedaar hue isi kirdaar se ham saahab-e-kirdaar hue kabhi kaanTon ki jaraahat se bhi aaraam milaa laala-o-gul bhi kabhi baais-e-aazaar hue aadmiyyat ke khad-o-khaal ko zinat na mili saare aaiin faqat naqsh-ba-divaar hue haae vo husn kisi ne bhi na dekhaa jis ko haae vo raaz jo rusvaa sar-e-baazaar hue kitne dushman the zamaane mein hamaare lekin apni hi hasti se ham barsar-e-paikaar hue dosto ek tumhaari bhi riyaa-kaari se ham ko honaa thaa khabar-daar khabar-daar hue nauha-e-zaat kaa ye bhi to ik andaaz huaa ashk aankhon mein nahin aae to ash’aar hue baat kuchh yuun hai ki himmat hi na haari ham ne mere pindaar-e-khudi par to bahut vaar hue rang-o-bu paanv ki zanjir hue jaate hain jaa nasim-e-sahari ham to giraftaar hue ham ki sar-garm-e-safar the rahe sar-garm-e-safar marhale to kabhi aasaan kabhi dushvaar hue ab to naa-qadri-e-arbaab-e-hunar hai ai 'lais' aap kyaa soch ke is 'ahd mein fankaar hue"

"ahl-e-jahaan ke saath vafaa yaa jafaa karun meri samajh mein kuchh nahin aataa hai kyaa karun ye dard-e-dil to haasil-e-umr-daraaz hai main is ko apni zaat se kyuun kar judaa karun duniyaa yahi karegi to duniyaa se peshtar majruh kyuun na khud hi main apni anaa karun duniyaa mein kaun hai jo nahin hai mire khilaaf ik tum hi rah gae ho tumhein bhi khafaa karun har zaaviye se ziist ne rusvaa kiyaa mujhe kis rukh se apni zaat kaa ab saamnaa karun ehsaan jo uThaae hain auron ke vaaste auron pe hain vo qarz magar main adaa karun aankhon ko niind ki bhi rifaaqat nahin nasib main shama to nahin ki sahar tak jalaa karun hasrat hi rah gai ki bahaaron ke darmiyaan tere baghair bhi to kabhi khush rahaa karun begaanagi ko chhoD ke fitrat bhi hans paDe aadam ke naam par koi aisi khataa karun jab karb-e-aagahi mein huun ai 'lais' aaj-kal is karb-e-aagahi se kise aashnaa karun"

"dil muzmahil hai teri navaazish ke baavajud ye sarzamin udaas hai baarish ke baavajud khira na kar sake nigah-e-imtiyaaz ko jhuTe nagin numud-o-numaaish ke baavajud ek phuul bhi chaman mein na dil khol kar hansaa shabnam ke aansuon ki guzaarish ke baavajud kyaa qahr hai ki jhuuT mein milti hai aafiyat sach bolnaa muhaal hai khvaahish ke baavajud meraa vaqaar ziist na majruh kar sake dushman hazaar hila-o-saazish ke baavajud apni ghalat ravish ko na tabdil kar sake kuchh dost baar baar guzaarish ke baavajud barkhud ghalat kabhi na hue zindagi mein 'lais' duniyaa-e-fan mein daad-o-sataaish ke baavajud"

"khuub andaaz-e-paziraai hai izzat-e-nafs pe ban aai hai gham-e-dauraan gham-e-jaanaan gham-e-jaan meri in sab se shanaasaai hai haath phailaayaa hai apne aage ye gadaai hai ki daaraai hai dil ke aaine mein ye tu hai ki main ek surat si nazar aai hai tajraba ye hai ki har zulf-e-khirad dast-e-vahshat hi ne suljhaai hai dil ko iflaas kaa ehsaas nahin kaisi daulat mire haath aai hai husn-e-mahsus jise kahte hain mere ehsaas ki raanaai hai ai bahaar-e-lab-o-aariz ye bataa tu kisi ko kabhi raas aai hai vaqt hai dar-pa-e-aazaar magar 'lais' ko zoam-e-shakebaai hai"

"ye masala hai aur koi masala nahin apnaa harif main huun koi dusraa nahin kal mujh pe khul gayaa tiraa husn-e-munaafiqat is saanehe ke baad koi saaneha nahin muflis nahin hai zehn-e-tahi-dast huun to kyaa dast-e-talab daraaz kahin bhi kiyaa nahin har-gaam-o-har-nafas rahe darpesh marhale zauq-e-safar gavaah ki main bhi rukaa nahin ai maslahat-pasand hamaaraa bhi tere saath har-chand raabta hai magar raabta nahin duniyaa se chand roz mein sab kuchh to mil gayaa milnaa ab aur kyaa hai jo ab tak milaa nahin mumkin nahin ki aaein azaaem mein laghzishein uftaada vaqt hi to hai uftaad-paa nahin chhoTaa huun is liye mujhe ehsaan hain sab ke yaad mohsin ko bhuul jaaun main itnaa baDaa nahin ahvaal vaaqai to hai khud hi zabaan-e-jaan lekin sar-e-ghurur kahin bhi jhukaa nahin main tujh ko yaad aauun aur aauun tamaam-umr ai dost main buraa huun par itnaa buraa nahin jau bone vaale bo ke to jau chal diye magar kahte hain ab ke fasl mein gandum ugaa nahin khvaab-e-baqaa ki bas yahi taabir hai ki 'lais' duniyaa mein sirf ek fanaa ko fanaa nahin"

"koi payaam-e-musalsal hai shor-e-dariyaa bhi tahi-sukhan se nahin hai sukut-e-sahraa bhi fazaa-e-dasht mein ahl-e-junun ke hangaame hamein to raas na aai magar ye duniyaa bhi zamin-e-tishna-dahan ki sadaa to aai thi magar ye baat ki abr-e-bahaar barsaa bhi ye bu-e-gul bhi pareshaan bahut hui lekin bahut huaa miri aavaargi kaa charchaa bhi kiyaa hai fath koi lamha-e-vafaa jab se miri giraft mein imroz bhi hai fardaa bhi abhi to tishna-labi ke surur mein gum hain ham ahl-e-zarf kareinge kabhi taqaaza bhi jahaan ko dekhne vaali hazaar aankhein hain inhin mein hogi kahin koi chashm-e-binaa bhi jo be-hunar hain vo shaaista-e-gunaah nahin gunaah karne mein ik shart hai saliqa bhi ajiib aalam-e-begaangi mein aa nikle garaan guzarti hai dil par tiri tamannaa bhi jo mil rahaa thaa ba-zaahir baDe khulus ke saath janaab-e-'lais' ne us aadmi ko samjhaa bhi"

"baarhaa yurish-e-afkaar ne sone na diyaa fikr aazaad hai aazaar ne sone na diyaa band thiin daaera-e-khvaab mein aankhein apni fikr ki gardish-e-parkaar ne sone na diyaa thi tasavvur mein nihaan-khaana-e-dil ki tasvir raat-bhar dida-e-bedaar ne sone na diyaa mujh se the bar-sar-e-paikaar mire zehn-o-zamir mujh ko bedaari-e-kirdaar ne sone na diyaa koi manzar thaa ki thaa manzar-e-rangin kaa fareb kyaa kahin khvaab-e-pur-asraar ne sone na diyaa mujh pe is tarah se raushan thi haqiqat apni umr-bhar chashm-e-khabar-daar ne sone na diyaa main ne kuchh dhuup mein jalte hue chehre dekhe phir mujhe saaya-e-divaar ne sone na diyaa raat-bhar baarish-e-ilhaam rahi hai dil par subh tak abr-guhar-baar ne sone na diyaa 'lais' mauzu-e-sukhan fikr-e-bashar thi ham the aur phir garmi-e-guftaar ne sone na diyaa"

"manaazir-e-shab-e-rafta khayaal-o-khvaab hue vo ashk the ki sitaare sabhi kharaab hue vo naa-khudaa ki khudaai kaa jin ko daavaa thaa safine un ki himaaqat se zer-e-aab hue ham ahl-e-dard zamaane ke haath kyaa aate ki ham to apne liye bhi na dastiyaab hue talaash-e-jaam-e-tarab mein kahaan kahaan na gae piye baghair bhi ham to bahut kharaab hue ham un ke aib ko kyaa aur kyuun ayaan karte jo be-zamir the vo khud hi be-naqaab hue fareb hi se navaazaa hai un rafiqon ne miri janaab mein aa kar jo baaryaab hue tamaam umr mazaaq-e-junun jo rakhte the rah-e-khirad mein vahi log kaamyaab hue hamaaraa sabr hai be-intihaa to hairat kyaa ki 'lais' ham pe sitam bhi to be-hisaab hue"

"be-qasd safar jaate hain maalum nahin kyuun phir khud hi Thahar jaate hain maalum nahin kyuun ham pyaar se jiine ki duaa dete hain jin ko vo log bhi mar jaate hain maalum nahin kyuun kuchh log tujhe dekh ke ai fasl-e-bahaaraan baa-dida-e-tar jaate hain maalum nahin kyuun ik vahm samajhte the haqiqat ko jo kal tak ab khvaab se Dar jaate hain maalum nahin kyuun utre hue chehron ko bhi ye kahte sunaa hai kuchh ham se bhi Dar jaate hain maalum nahin kyuun ik silsila ashk hai shabnam magar is se gulzaar nikhar jaate hain maalum nahin kyuun manzil ki taraf raah-e-mohabbat ke musaafir be-rakht-e-safar jaate hain maalum nahin kyuun kuchh dekh ke kuchh soch ke kuchh log jahaan se chup-chaap guzar jaate hain maalum nahin kyuun kashti ko Dubo kar usi kashti ke muhaafiz khud paar utar jaate hain maalum nahin kyuun ghar mein koi aaraam ki surat nahin phir bhi thak-haar ke ghar jaate hain maalum nahin kyuun haan aks-e-rukh-e-sang-zada se bhi to ai 'lais' aaine sanvar jaate hain maalum nahin kyuun"

"sukut-e-lab ko mire arz-e-haal hi samjho miri anaa-e-khafi ko savaal hi samjho vo ru-ba-ru hain mire dil magar ye kahtaa hai khayaal-e-husn ko husn-e-khayaal hi samjho rafaaqaton ke qarine badalte rahte hain so karb-e-hijr ko lutf-e-visaal hi samjho taDap rahe hain jo yuun ham sadaa-e-saaz ke saath use kuchh aur nahin vajd-o-haal hi samjho mire hunar ko rahaa bazm-e-kam-nazar se gurez use bhi mere hunar kaa kamaal hi samjho havaa-e-subh-e-chaman aur ek baar agar guzar gai to hamein paaemaal hi samjho dilon ke zakhm chhupe hain lahu ki chaadar mein tumhein gharaz nahin tum indimaal hi samjho husul-e-kaif ko mai-khaana-e-hayaat mein 'lais' shikast-e-jaam se pahle muhaal hi samjho"

"teri jafaa hui ki jahaan kaa ghazab huaa ham par to jo sitam bhi huaa be-sabab huaa is saaat-e-said ko kyaa naam dijiye insaan asir-e-vaqt ke zindaan mein jab huaa shoala-sifat hain raqs mein apne chaman ke phuul is aalam-e-bahaar mein ye kyaa ghazab huaa shaayad yahi mazaaq-e-talab ki hai intihaa duniyaa-e-rang-o-bu mein bhi dil be-talab huaa munsif ko maslahat ki zabaan raas aa gai go faisla huaa magar insaaf kab huaa us ko nasib ho na sakaa rishta-e-khulus jo qaail-e-qaziya-e-hasab-o-nasab huaa jaari hai ek tirgi-o-raushni ki jang jab se shuur-e-silsila-e-roz-o-shab huaa had-e-nigaah tak kahin shoale kahin dhuaan ye khaak-o-khun kaa khel gulistaan mein kab huaa is haadse pe aap kaa jo tabsira bhi ho main aashnaa-e-mahfil-e-aish-o-tarab huaa kaise ho tum ko lazzat-e-aazaad jaan-nasib dushvaar marhalon se guzarnaa hi kab huaa kitne aziim log tah-e-khaak ho gae tu bhi huaa jo 'lais' to phir kyaa ajab huaa"

"zamir-o-zehan se ki hain baghaavatein kyaa kyaa munaafiqon se nibhaain rifaaqatein kyaa kyaa hayaat arsa-e-karb-o-balaa mein guzri hai tamaam-umr hui hain shahaadatein kyaa kyaa kisi se pyaar kisi se vafaa kisi se khulus bigaD gai hain hamaari bhi aadatein kyaa kyaa ye jabr hai ki gharaz se gharaz badalte hain hamein aziiz thiin varna sharaafatein kyaa kyaa mizaaj-e-vaqt ne chhinaa hai mujh se meraa mizaaj guzarti rahti hain dil par qayaamatein kyaa kyaa sabaa pe harf na aae kiran kaa dil na dukhe shagufta gul ke liye hain nazaakatein kyaa kyaa ye aur baat samajhne se ham hain qaasir 'lais' jabin-e-vaqt par dekhin ibaaratein kyaa kyaa"

"ye aarzu hain ham koi aarzu karte asiir khud ko na ham daam-e-rang-o-bu karte itaab-bin jo hamaare hain nukta-chin ham par kahin jo milte to ham khul ke guftugu karte vo aaina jo kare harf-giri-e-kirdaar jo haath aae to logon ke ru-ba-ru karte kahin suraagh-e-khulus-o-vafaa agar miltaa to apni zaat ko ham vaqf-e-justuju karte ham aaj ashk-ba-daamaan jo hain to ronaa kyaa tamaam-umr hi guzri hai haa-o-hu karte misaal-e-aaina rakhte jo dil mein aks-e-jamil kabhi tabaah na shishe ki aabru karte kharaab hote kharaabe mein aur kyaa hotaa huzur-e-saaqi agar ham subu subu karte hamein bhi kaash jo taufiq-e-aizdi hoti to ham bhi kausar-o-tasnim se vuzu karte yaqin jo hotaa ki honge halaak sidq-o-vafaa to ehtimaam se marne ki aarzu karte hamein bhi raas jo aati shaguftagi dil ki to 'lais' ham bhi kabhi jurat-e-numu karte"