Ghazal

"jafaa-e-ahd kaa ilzaam ulaT bhi saktaa huun use yaqin na thaa main palaT bhi saktaa huun main apne ishq mein shaahin mizaaj rakhtaa huun palaT to jaataa huun lekin jhapaT bhi saktaa huun junun mein zulm ki gardan utaar letaa huun to ik nigaah-e-mohabbat mein kaT bhi saktaa huun adu-e-shahr main baarud huun mohabbat kaa hadon se baat baDhegi to phaT bhi saktaa huun bisaat-e-arz pe chaahun to phail jaaun main ho ramz-e-yaar to dil mein simaT bhi saktaa huun"

"vaqt kaa silsila nahin ruktaa laakh roko zaraa nahin ruktaa ye zamin hai khudaaon kaa madfan aadam-e-kaj-adaa nahin ruktaa ishq vo chaar su safar hai jahaan koi bhi raasta nahin ruktaa raftagaan aaina dikhaataa hai kuchh bhi ho irtiqaa nahin ruktaa"

"log laDte rahe naam aae talab-gaaron mein ham ki chup-chaap khaDe the tire bimaaron mein zulm ke ham hain mukhaalif magar ik din ke liye shor har roz nayaa uThtaa hai akhbaaron mein aaj-kal shikva-e-naapaid hai jis ghairat kaa khuub bikti hai mire shahr ke baazaaron mein fakhr kyaa kam hai ki nilaami-e-yusuf mein 'naim' tahi-daamaan the magar the to kharidaaron mein"

"shuur-e-zaat ke saanche mein Dhalnaa chaahtaa huun main girne se bahut pahle sambhalnaa chaahtaa huun libaas-e-aadam-e-khaaki badalnaa chaahtaa huun main apne jism se baahar nikalnaa chaahtaa huun tumhaari yaad ki baarish mein jalnaa chaahtaa huun main sang-o-khisht huun lekin pighalnaa chaahtaa huun mire andar khazaane hain ugalnaa chaahtaa huun tah-e-paataal ko chhu kar uchhalnaa chaahtaa huun mujhe pichhe nahin rahnaa hai jiine ki tamannaa husain ibn-e-ali ke saath chalnaa chaahtaa huun"

"gin rahe hain dil-e-naakaam ke din phir vahi gardish-e-ayyaam ke din dukh se aaghaaz aur gham pe akhir ham ne paae baDe inaam ke din hai yahi soch kar aaraam hamein mil gae hain unhein aaraam ke din ab nahin kaam koi duniyaa kaa goyaa ye din hain baDe kaam ke din hain vo phir se mire nazdik 'naim' aae andesha-e-anjaam ke din"

"ghair ke ghar sahi vo aayaa to gham hi mere liye vo laayaa to dushmanon ko muaaf kar Daalaa doston se fareb khaayaa to peD ke ghonslon kaa kyaa hogaa ghar use kaaT kar banaayaa to phir mire saamne thi ik divaar ek divaar ko giraayaa to kis qadar zor se hui baarish main ne kaaghaz kaa ghar banaayaa to kyaa karoge 'naim' saal-e-nau pesh-rau ki tarah hi aayaa to"

"ho gae ham shikaar phulon ke hain ghazab ikhtiyaar phulon ke meri tanhaaiyaan bataati hain phuul hote hain yaar phulon ke ek manzil hai mukhtalif raahein rang hain be-shumaar phulon ke aaj phulon ke aalami din par us ne bheje hain khaar phulon ke phuul hain sher bu-e-gul dhun hai ham hain naghma-nigaar phulon ke"

"har sach baat mein ham donon hain ilzaamaat mein ham donon hain qarya qarya basti basti mauzuaat mein ham donon hain sassi punnun lailaa majnun qissa-jaat mein ham donon hain khabron kaa unvaan ho jo bhi tafsilaat mein ham donon hain saare maslak ek hue hain sab ki ghaat mein ham donon hain jin haalaat se Darte the ham un haalaat mein ham donon hain"

"manzil hai to ik rasta-e-dushvaar mein gum hai rasta hai to pech-o-kham-e-dildaar mein gum hai jis diin se miltaa thaa khudaa khaana-e-dil mein mullaa ke sajaae hue baazaar mein gum hai ajzaa-e-safar varta-e-hairat mein paDe hain raftaar abhi saahib-e-raftaar mein gum hai saail hain ki umDe hi chale aate hain paiham vo shokh magar apne hi didaar mein gum hai vo husn-e-yagaana hai koi shahr-e-tilismaat har shakhs jahaan raston ke asraar mein gum hai ashkhaas ke jangal mein khaDaa soch rahaa huun ik nakhl-e-tamannaa unhi ashjaar mein gum hai yaa husn hai naa-vaaqif-e-pindaar-e-mohabbat yaa ishq hi aasaani-e-atvaar mein gum hai ai kaash samajhtaa koi pas-manzar-e-paighaam duniyaa hai ki pairaaya-e-izhaar mein gum hai"

"bikhraa hai kai baar sameTaa hai kai baar ye dil tire atraaf ko niklaa hai kai baar jis chaand ke didaar ki hasrat mein hai duniyaa vo shaam Dhale ghar mire utraa hai kai baar sun kar tujhe madhosh zamaana hai mujhe dekh jis ne tiri aavaaz ko dekhaa hai kai baar afsos ki hai ishq-e-yagaana se bahut duur yaaro tumhein har roz jo hotaa hai kai baar"

"ghaDi jiitaa ghaDi martaa rahaa huun use jaate hue taktaa rahaa huun main khud ko saamne tere biThaa kar khud apne se gila kartaa rahaa huun jo saare shahr kaa thaa us ki khaatir main saare shahr se laDtaa rahaa huun main vaqt-e-khaana-e-mazdur thaa so ba-taur-e-imtihaan kaTtaa rahaa huun bahut pahchaantaa huun zaahidon ko tumhaare ghar kaa main rasta rahaa huun"

"chashm-o-dil saahab-e-guftaar hue jaate hain raaste aql ko dushvaar hue jaate hain hijr-e-derina se ab khush the bahut main aur vo ab magar faasle bezaar hue jaate hain vo nigaahein hain mughanni ki thirakti porein saaz soe hue bedaar hue jaate hain sher-goi tiraa mansab to nahin tifl-e-sukhan haan magar hijr mein do chaar hue jaate hain nisbat-e-abjad-e-kirdaar na thi jin ko 'naim' saahab-e-azmat-e-kirdaar hue jaate hain"

"jo us aankh se niklaa hogaa aansu mere jaisaa hogaa us ki yaad mein kho kar khud ko reza reza chuntaa hogaa dil ke tah-khaane mein koi siDhi siDhi utraa hogaa shaam Dhale ik huuk suni hai yaad kaa panchhi lauTaa hogaa dil ki ujDi kheti mein bhi khvaab suhaane botaa hogaa aao maikhaane mein DhunDein koi to ham jaisaa hogaa"

"vo mire dil mein yuun samaa ke gai laakh chaahaa magar na jaa ke gai ek arsa huaa kabhi na khuli dil pe jo girah vo lagaa ke gai raat gham ki kaTe nahin kaTti subh ik pal mein muskuraa ke gai maan TuuTe to phir nahin juDtaa bad-gumaani kabhi na aa ke gai ai 'naim' ab na vaapsi hogi baarhaa zindagi bataa ke gai"

"faisla ho gayaa hai raat gae lauTne vo gayaa hai raat gae vo sahar kaa safir thaa shaayad raushni bo gayaa hai raat gae ishq tu bhi zaraa Tikaa le kamar dil bhi ab so gayaa hai raat gae vaqt kaanTe nae bichhaaegaa raaste dho gayaa hai raat gae chain paDtaa nahin 'naim' tujhe jaane kyaa kho gayaa hai raat gae"

"vaqt par ishq-e-zulekhaa kaa asar lagtaa hai aakhir-e-umr bhi aaghaaz-e-safar lagtaa hai ye samundar hai magar sokhta-jaan shaair ko kisi majbur kaa ik dida-e-tar lagtaa hai subh-e-taaza hai muqaddar dil-e-maayus Thahar shajar-e-ummid pe inaam-e-samar lagtaa hai main zabaan-bandi kaa ye ahd nahin toDungaa haan magar is dil-e-gustaakh se Dar lagtaa hai hamein idraak-e-mohabbat to nahin hai lekin itnaa maalum hai is khel mein sar lagtaa hai"

"mujhe rifaton kaa khumaar thaa so nahin rahaa tire doston mein shumaar thaa so nahin rahaa jise ab samajhte ho baar dida-o-jaan pe kabhi raah-e-manzil-e-yaar thaa so nahin rahaa tiri yaad bhi teri yaad thi so chali gai tiraa gham hi meraa qaraar thaa so nahin rahaa rah-e-dosti ke musaafiro zaraa dekh kar isi rah kaa main bhi savaar thaa so nahin rahaa vo jo puchhte hain 'naim' kaa use kyaa huaa unhein kah do un pe nisaar thaa so nahin rahaa"

"teri aankhon ke do sitaare the jin pe ham do jahaan haare the saari taarif thi use zebaa jitne bohtaan the hamaare the jitni aankhein thiin saari meri thiin jitne manzar the sab tumhaare the din vahi umr bhar kaa haasil hain jo tiri yaad mein guzaare the"

"kisi mahal mein na shaahon ki aan-baan mein hai sukun jo kisi Dhaabe ke saaebaan mein hai main us maqaam pe huun jaise koi khaali haath nigaah-e-hasrat-o-armaan liye dukaan mein hai darinde shahr mein aabaad ho gae saare sunaa hai saath kaa jangal baDi amaan mein hai ye jaantaa hai palaT kar use nahin aanaa vo apni ziist ki khinchti hui kamaan mein hai"

"saamne apne tu bulaa ke to dekh hausla meraa aazmaa ke to dekh mah-e-kaamil bhi maand paD jaae apnaa chehra use dikhaa ke to dekh aaj qaus-e-quzah kaa lutf kahaan apne aariz pe rang hayaa ke to dekh main tiri aakhiri zarurat huun tu kabhi mujh se duur jaa ke to dekh jaan-ba-lab huun qaraar aa jaae apni palkein zaraa uThaa ke to dekh hain duaaon se moajize mumkin tu khudaa ko kabhi manaa ke to dekh"