Ghazal

"puraane ahd ke sikke kahaan chalaa rahe ho vafaa khulus mohabbat ye kyaa sunaa rahe ho bhalaa tum itne aziyyat-pasand kab se hue jo baat baat pe yuun qahqahe lagaa rahe ho safar hi khaana-ba-doshon ko zeb detaa hai saraae kaafi hai ghar-baar kyon banaa rahe ho kiran kiran ko taraste hain mere gaanv ke log aur ek tum ki nadi mein diye bahaa rahe ho tumhaari aankh mein ik be-kanaar hasrat hai tum is se pahle kahin aur mubtalaa rahe ho koi to ho jo gale se lagaa ke puchhe mujhe bataao 'badr' miri jaan kyaa chhupaa rahe ho"

"ham tire hone se logon pe ayaan hote hain phuul khushbu ke tavassut se bayaan hote hain in charaaghon se andheraa hi baDhaa hai ghar kaa tere tohfe bhi aziyyat kaa dhuaan hote hain aise afsurda tabiat hain ki hanste hue ham kitni sadiyon ki udaasi kaa nishaan hote hain ishq mein zillat-o-rusvaai bhi hoti hai magar pahle is dasht mein khvaabon ke jahaan hote hain ham jinhein ishq ne tanhaai kaa tohfa diyaa ho un ke ghar-baar nahin hote makaan hote hain ahd-e-kam-zarf mein tu khvaab liye phirtaa hai peD aise mein samar-baar kahaan hote hain"

"apni aavaaz ki zanjir se aazaad na kar qatl kar de magar aise mujhe barbaad na kar mujh se ghussa ho mujhe DaanT garebaan pakaD bas judaai ki koi baat sitam-zaad na kar jitnaa mumkin ho mohabbat-zada logon mein na baiTh zakhm-aalud rifaaqat ko kabhi yaad na kar is ko ujDaa huaa daanista banaayaa gayaa hai ajnabi tu dil-e-naashaad ko aabaad na kar ham hain pahle hi tire makhmalin lahje ke asiir ab tu is chashm-e-ghazal-zaad ko sayyaad na kar"

"dil ne kyaa kyaa tire jaane pe duhaai nahin di shor itnaa thaa ki aavaaz sunaai nahin di tujh se bichhDe the ki phir sainkaDon dil toD diye bad-havaasi mein koi raah sujhaai nahin di tu ne us shakhs se milnaa thaa to mujh se kahtaa phuul dekhaa hai faqat khushbu dikhaai nahin di lamha lamha vo duaa ban ke mire saath rahaa jaane vaale ne kabhi mujh ko judaai nahin di aakhiri vaar mohabbat pe kiyaa thaa us ne aakhiri baar use main ne safaai nahin di vo kisi aur kaa ho ke bhi mujhe miltaa rahaa us ne darvaaza khulaa chhoDaa rihaai nahin di"

"bahut hansaa thaa bahut udaasi se bhar gayaa huun main yaar khilne ke mausamon mein bikhar gayaa huun tumhaare jaane se zaahiran kuchh nahin huaa hai main jaantaa huun magar main andar se mar gayaa huun tu apne kaamon mein kitnaa masruf ho gayaa hai main is judaai pe sabr aane se Dar gayaa huun kisi pe tohmat nahin lagaai kisi ki khaatir yahi vajah hai bahut dilon se utar gayaa huun mujhe mohabbat kaa vaasta de ke mat pukaaro main is taalluq ki sarhadon se guzar gayaa huun"

"dast-e-qaatil ko mohabbat kaa sabab karte hain ham diye hain jo havaaon kaa adab karte hain kis aziyyat se guzarte hain kabhi soch ke dekh log jo niind nahin maut talab karte hain khvaab mahbub dharam naam sabhi kuchh kho kar khud-kushi gar nahin karte to ghazab karte hain yuun to vahshat hai yaa ghussa hai hamaari pahchaan haan magar pyaar bahut karte hain jab karte hain aah ko qahqaha karne kaa hunar jaante hain maatami rang ko ham rang-e-tarab karte hain ham se logon ko hi majzub kahaa jaataa hai yaar ke naam ko jo naam-o-nasab karte hain"

"tu jaantaa bhi hai is kahaani kaa kyaa banegaa tiri aqidat se sang-reza khudaa banegaa ise malungaa to meri miTTi chamak uThegi ye phuul us ke labon ko chhu kar duaa banegaa ham itni raghbat se us ki aankhon ko dekhte hain khudaa-na-karda ye shauq baDh kar nasha banegaa tire banaae hasin chehron se zakhm khaate khudaayaa tere nahif bandon kaa kyaa banegaa ham ek shoale ki dastaras mein bhaDak rahe hain ab aage aage hamaaraa dil bhi diyaa banegaa ye lamha jis mein ham aaj chhup kar gale mile hain agar muqaddar nahin milaa to sazaa banegaa main do qabilon ki dushmani ko miTaa rahaa huun hamaari shaadi se ik nayaa silsila banegaa"

"itni raghbat se na mil 'ishq ke bimaaron se aag tujh mein bhi bhaDak sakti hai angaaron se kis ko mujh dasht se aasaaish-e-jaan pahunchegi kaun khush hotaa hai duniyaa mein gunahgaaron se dastaras mein to bahut kuchh thaa magar tere baa'd ham ne khushbu bhi kharidi nahin baazaaron se tu ne dekhaa bhi nahin aa ke dubaara mujh ko aise kartaa hai bhalaa koi vafaadaaron se ye to ham hain tiri aankhon pe mare baiThe hain varna ab koi nahin kheltaa talvaaron se honT se kaan ki lau tak tumhein chumeinge kabhi ham tumhein fath kareinge tire hathiyaaron se"

"meraa har zakhm hai dayaa kaa vajud kaaTtaa hai mujhe havaa kaa vajud mere haalaat masala nahin hain masala hai miri anaa kaa vajud maan kaa honaa to aisi neamat hai jaise duniyaa mein hai duaa kaa vajud tujh se bichhDaa to main simaTtaa gayaa aur khultaa rahaa khudaa kaa vajud maantaa huun main zindagi ko bhi haan magar jaise badduaa kaa vajud"

"baazu hain tere halqa-e-radd-e-balaa mujhe ai shakhs ek baar gale se lagaa mujhe tere baghair jiine ki 'aadat nahin hui lekin ye tajraba baDaa mahngaa paDaa mujhe mere badan se jis ki mahak jaa nahin rahi vo shakhs bhi samajhne lagaa dusraa mujhe us ke ba-qaul us ko koi hosh hi na thaa varna vo mujh se mil ke bahut chumtaa mujhe paiham aziyyatein hain ye saansein tire baghair lagne lagi hai zindagi ik bad-du'aa mujhe tu kah rahaa hai sabr karun is judaai par sach-much agar judaai pe sabr aa gayaa mujhe"