biich dariyaa mein utar kar dekhiye — Aamir Rahmati

haTaa kar phuul kaanTe hi bichhaa do
hamein chalne mein diqqat ho rahi hai

ham jaison ko bas itni ijaazat hai mire dost
ham dekh hi sakte hain pasand aayaa huaa shakhs

rokiye rokiye sarkaar ise
aankh talvaar hui jaati hai

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

'ishq mein intihaa ki had na hui
'aashiqi teri mustanad na hui

mohabbat phuul banne par lagi thi
palaT kar phir kali kar li hai main ne

kuchh aur vus'atein darkaar hain mohabbat ko
visaal-o-hijr pe daar-o-madaar mushkil hai

tazkira soz-e-mohabbat kaa kiyaa thaa ik baar
taa-dam-e-marg zabaan se miri chhaale na gae