ek manzar mein lipTe badan ke sivaa — Aashufta Changezi

tujh se bichhaDnaa koi nayaa haadsa nahin
aise hazaaron qisse hamaari khabar mein hain

ye baat yaad rakheinge talaashne vaale
jo us safar pe gae lauT kar nahin aae

arse se is dayaar ki koi khabar nahin
mohlat mile to aaj kaa akhbaar dekh lein

kyuun khilaune TuTne par aab-dida ho gae
ab tumhein ham kyaa bataaein kyaa pareshaani hui

aankh khulte hi bastiyaan taaraaj
koi lazzat nahin hai khvaabon mein

sabhi ko apnaa samajhtaa huun kyaa huaa hai mujhe
bichhaD ke tujh se ajab rog lag gayaa hai mujhe

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

charaagh ki thartharaati lau mein har os qatre mein har kiran mein
tumhaari aankhein kahaan nahin thiin tumhaaraa chehra kahaan nahin thaa

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

shor din ko nahin sone detaa
shab ko sannaaTaa jagaa detaa hai

zaahir huaa hai mujh pe yatimi ki pahli raat
ab meraa jism aadhaa hai aadhaa nahin rahaa

raat ko ashk diye khuun diyaa aahein diin
phir kahin jaa ke ye 'mahmud' ujaale hue hain