aankh khulte hi bastiyaan taaraaj — Aashufta Changezi

tujh se bichhaDnaa koi nayaa haadsa nahin
aise hazaaron qisse hamaari khabar mein hain

ye baat yaad rakheinge talaashne vaale
jo us safar pe gae lauT kar nahin aae

arse se is dayaar ki koi khabar nahin
mohlat mile to aaj kaa akhbaar dekh lein

kyuun khilaune TuTne par aab-dida ho gae
ab tumhein ham kyaa bataaein kyaa pareshaani hui

ek manzar mein lipTe badan ke sivaa
sard raaton mein kuchh aur dikhtaa nahin

sabhi ko apnaa samajhtaa huun kyaa huaa hai mujhe
bichhaD ke tujh se ajab rog lag gayaa hai mujhe

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

khvaab kaa darvaaza kui masdud kar detaa hai roz
paDte hain raaton ko yaan aise hi patthar khvaab mein

aur mat dekhiye ab adl-e-jahaangir ke khvaab
aur kuchh kijiye zanjir hilaane ke sivaa

khvaahishon ki dhuul se chehre ubharte hi nahin
ham ne kar ke dekh liin khvaabon ki taabirein bahut

din nikalte hi vo khvaabon ke jazire kyaa hue
subh kaa suraj miri aankhein churaa kar le gayaa