ashkon mein piro ke us ki yaadein — Hasan Abidi

dil ki dahliz pe jab shaam kaa saaya utraa
ufuq-e-dard se siine mein ujaalaa utraa

sab ummidein mire aashob-e-tamannaa tak thiin
bastiyaan ho gaiin gharqaab to dariyaa utraa

kuchh na kuchh to hotaa hai ik tire na hone se
varna aisi baaton par kaun haath maltaa hai

shahr-e-naa-pursaan mein kuchh apnaa pata miltaa nahin
baam-o-dar raushan hain lekin raasta miltaa nahin

duniyaa kahaan thi paas-e-viraasat ke zimn mein
ik diin thaa so us pe luTaae hue to hain

ai khudaa insaan ki taqsim-dar-taqsim dekh
paarsaaon devtaaon qaatilon ke darmiyaan

mere khvaabon ke jharokon ko sajaate rahiye
na sahi vasl magar yaad to aate rahiye

umr guzri hai magar khud se judaa kar na sake
bhulne vaale tiri yaad mein kyaa rakkhaa hai

aaj tak yaad hai kaifiyyat-e-jaan tere huzur
sar se paa tak vo miraa dast-e-duaa ho jaanaa

gali ke moD se ghar tak andheraa kyuun hai 'nizaam'
charaagh yaad kaa us ne bujhaa diyaa hogaa

yaadon ki rut ke aate hi sab ho gae hare
ham to samajh rahe the sabhi zakhm bhar gae

goyaa tumhaari yaad hi meraa ilaaj hai
hotaa hai pahron zikr tumhaaraa tabib se