jahaan apnaa qissa sunaanaa paDaa — Aasi Uldani

sabr par dil ko to aamaada kiyaa hai lekin
hosh uD jaate hain ab bhi tiri aavaaz ke saath

apni haalat kaa khud ehsaas nahin hai mujh ko
main ne auron se sunaa hai ki pareshaan huun main

kahte hain ki ummid pe jiitaa hai zamaana
vo kyaa kare jis ko koi ummid nahin ho

ishq paaband-e-vafaa hai na ki paaband-e-rusum
sar jhukaane ko nahin kahte hain sajda karnaa

betaab saa phirtaa hai kai roz se 'aasi'
bechaare ne phir tum ko kahin dekh liyaa hai

murattab kar gayaa ik ishq kaa qaanun duniyaa mein
vo divaane hain jo majnun ko divaana bataate hain

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

dil to saada hai teri har baat ko sachchaa maantaa hai
aql ne baatein karte teraa aankh churaanaa dekhaa hai

labon par tabassum to aankhon mein aansu thi dhuup ek pal mein to ik pal mein baarish
hamein yaad hai baaton baaton mein un kaa hansaanaa rulaanaa rulaanaa hansaanaa

vo jo anaa ki qaid mein ab tak hai mutmain
ab us ke lauTne kaa gumaan kis liye karein

samajhtaa huun main sab kuchh sirf samjhaanaa nahin aataa
taDaptaa huun magar auron ko taDpaanaa nahin aataa