parinde sab nahin zindaan mein maare gae hain — Abdul Mannan Samadi

ulaT kar jab bhi dekhi hai kitaab-e-zindagi ham ne
to har ik lafz ke pichhe koi ik haadisa niklaa

badan par is-qadar baarish mire hoti hai boson ki
ki jab baanhein tiri mujh par khuli hon Daaliyaan ban kar

vahi rusvaai kaa meri sabab aakhir bane maulaa
vahi jo log kal shaamein suhaani karne vaale the

vahi ik qissa ab tak dhyaan mein raushan nahin hotaa
tasalsul jis se vaabasta hai pichhli daastaanon kaa

tasavvur ki hadon se duur jaa kar kaise dekheinge
agar tum se ta'alluq ghaaebaana bhi nahin hogaa

kuchh badan ke the taqaaze kuchh sharaarat dil ki thi
aaj lekin ishq apnaa jaavedaan hone ko thaa

jinhein ye fikr nahin sar rahe rahe na rahe
vo sach hi kahte hain jab bolne pe aate hain

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

subh tak main sochtaa huun shaam se
ji rahaa hai kaun mere naam se

tah kar chuke bisaat-e-gham-o-fikr-e-rozgaar
tab khaanqaah-e-ishq-o-mohabbat mein aae hain

kabhi miloge ye soch kar dil
hazaar sapne bunaa karegaa

shaakh se TuuT ke patte ne ye dil mein sochaa
kaun is tarah bhalaa maail-e-hijrat hogaa