jab thi manzil nazar mein to rasta thaa ek — Abdullah Javed

tum apne aks mein kyaa dekhte ho
tumhaaraa aks bhi tum saa nahin hai

dekhte ham bhi hain kuchh khvaab magar haae re dil
har nae khvaab ki taabir se Dar jaataa hai

saahil pe log yunhi khaDe dekhte rahe
dariyaa mein ham jo utre to dariyaa utar gayaa

phir nai hijrat koi darpesh hai
khvaab mein ghar dekhnaa achchhaa nahin

aap ke jaate hi ham ko lag gai aavaargi
aap ke jaate hi ham se ghar nahin dekhaa gayaa

ashk Dhalte nahin dekhe jaate
dil pighalte nahin dekhe jaate

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

safar mein aise kai marhale bhi aate hain
har ek moD pe kuchh log chhuT jaate hain

yuun to maujud apne ghar mein hai
aadmi mustaqil safar mein hai

ai dil na kar qubul mire dil na kar qubul
manzil shikast-e-shauq hai manzil na kar qubul

tamaam jism ko aankhein banaa ke raah tako
tamaam khel mohabbat mein intizaar kaa hai